İranın Beynəlxalq Mülki Aviasiya Təşkilatındakı (ICAO) nümayəndəsi Fərhad Pərvarəşin "Reuters"ə verdiyi məlumata görə, İran Fransanın Hava Nəqliyyatı Təhqiqatı Bürosundan vurulan Ukraynaya məxsus "Boeing" təyyarəsinin qara qutularının oxunması üçün kömək istəyib.

"İran Mülki Aviasiya Təşkilatı bir müddət əvvəl Fransanın Hava Nəqliyyatı Təhqiqatı Bürosundan xahiş edib ki, digər əlaqədar ölkələrin iştirakı ilə qara qutunun oxunmasına yardım etsin və İran qara qutunu Fransaya göndərə bilər", - Pərvarəş deyib.

Ancaq Fransa bürosu hələ rəsmi bir sorğu almadığını və kömək üçün İran, Kanada və Ukrayna ilə danışıqlar apardığını bildirib.

Bundan əvvəl İran ICAO-ya, istintaqda iştirak edən digər ölkələrin razılığı şərtilə Tehran yaxınlığında vurulan Ukraynaya məxsus "Boeing" təyyarəsinin qara qutusunun şifrəsini açmaq üçün Fransaya göndərəcəyini bildirmişdi.

Xatırladaq ki, tehrandan Kiyevə uçan "Boeing" 737-800 təyyarəsi yanvarın 8-də səhər tezdən Tehran hava limanından çıxdıqdan qısa müddət sonra vurularaq salınmışdı. Təyyarədə 176 nəfər ölmüşdü.