Məşhur futbolçular hər zaman oyunları ilə yadda qalmırlar. Onlar bəzən xeyirxah əməlləri ilə, bəzən əyləncələri ilə gündəmə gəlirlər. Amma bəzən də meydanda etdikləri aktyorluqları ilə. Aktyorluğun oyunla heç bir əlaqəsinin olmadığı ortaya çıxdıqda isə, məsələ tamamilə başqa cür olur. PSJ-nin hücumçusu Neymar da eyni ilə belə edib. Ötən həftə "Montpelyer"lə oyun zamanı qabırğası zədələndiyi üçün o, dünən axşam "Nant" - PSJ qarşılaşmasında forma geyinməyib.

Onun zədələnməsinin ən qəribə hissəsi isə budur ki, braziliyalı futbolçu istirahət etməli olduğu halda, bazar günü gecə saatlarında 28 yaşını Parisdəki gecə kulublarından birində verdiyi parti ilə qeyd edib. Bu isə rəhbərlikdə narahatçılıq yaradıb. Belə ki, baş məşqçi Tomas Tuçel verdiyi açıqlamada heyət seçiminin Neymarın ad günü partisi ilə heç bir əlaqəsinin olmadığını, son hadisələrin insanlara pis düşünmək fürsəti verdiyindən narahatlığını deyib.

Təbii ki, insanların belə düşünməsinə səbəb Neymarın son 6 ildə eyni vaxt düşdüyü durumdur. Belə ki, onun bacısı Rafaellanın 11 martda ad günüdür və hər il bu tarixdə Neymar meydanda olmur, eyni ilə öz ad günündə olduğu kimi.

Bacısının ad günündə:

2014/2015: qırmızı vərəqə

2015/2016: qırmızı vərəqə

2016/2017: zədəli

2017/2018: zədəli

2018/2019: zədəli

Öz ad günüdə:

2017/2018: zədəli

2018/2019: zədəli

2019/2020: zədəli.