Xəbər Lenti

Sorğu

İnfografika

Arxiv

23 Fevral

2017
12:08
1765
Nazirlik müəllimləri 4 ay işlədib əməkhaqlarını vermir - ŞİKAYƏT

Sumqayıt ş. 11 nömrəli tam orta məktəbin bir qrup müəllimi əmək və digər hüquqlarının kobudcasından pozulmasından, 4 aylıq əmək haqqı borclarının verilməməsindən şikayətçidirlər.

Dövlət başçısına, vitse-prezidentə, maliyyə nazirinə, ombudsmana və təhsil nazirinə ünvanlanan şikayət məktubunda bildirilir ki, Sumqayıt şəhərində inklüziv təhsil pilot layihə kimi 2005-ci ildən 11 №li tam orta məktəbdə tətbiq edilir. Şikayət edən müəllimlər bildirirlər ki, bu layihəyə müddətsiz müqavilə ilə  işə qəbul ediliblər və bugünkü günə kimi əmək münasibətləri davam etdirilir: 

“2016-cı ildən başlayaraq Təhsil Nazirliyinin yüksək çinli məmurlarının inklüziv layihə müddətinin 8 il əvvəl - 2009-cu ildə bitdiyini söyləməsi çox gülüncdür. 

İnklüziv layihənin müddəti 2009-cu ildə bitmişdisə, cənab Mikayıl Cabbarov 2013-cü ildən təhsil naziri təyin olunandan sonra inklüziv layihəyə 8 nəfər yeni işçi necə işə qəbul edilib?  

Prezident İlham Əliyevin 29.12.2012-ci il tarixli 800 №-li Fərmanı ilə təsdiq edilmiş “Azərbaycan 2020: gələcəyə baxış” İnkişaf Konsepsiyasında xüsusi qayğıya ehtiyacı olan, sağlamlıq imkanları məhdud uşaqlar üçün müxtəlif inkişafetdirici və inklüziv təhsil proqramların tətbiqi göstərilib.

Həmçinin, prezident İlham Əliyevin 24.10.2013, 19.01.2015-ci il tarixli 13 №-li və 995 №-li Sərəncamları əsasında “Azərbaycan Respublikasında təhsilin inkişafı üzrə Dövlət Strategiyası”nın həyata keçirilməsi ilə bağlı Fəaliyyət Planları hazırlanıb. Hər 2 fəaliyyət planlarında inklüziv təhsilə xüsusi önəm verilib.

2015-ci il tarixli Fəaliyyət planının 1.4 bəndi 2015-2023-cü illərdə inklüziv təhsilinin inkişafı üçün dövlət proqramının təsdiqi, maliyyə vəsaitinin ayrılması xüsusi qeyd edilib.

Təhsil Nazirliyinin bəzi məmurlarının AR Prezidentinin Fərman və Sərəncamlarını “görməzdən gəlib”  Sumqayıt şəhər 11 nömrəli tam orta məktəbdə gah layihə müddətinin bitməsini, gah da  ştatların qanunsuz artırılmasını iddia edib 4 aylıq əmək haqqı borclarımızı da ödəməməsi ən azından özbaşınalıqdır.

2009-cu ildən 2016-cı ilin sentyabr ayına kimi 7 il ərzində işləyib əmək haqqı almışıq. Ştatlar qanunsuz olubsa və ya layihənin müddəti bitmişdisə nə üçün büdcədən bizə maaş ayrılırdı? Büdcə təşkilatlarının ştat cədvəlləri hər il Maliyyə Nazirliyində qeydiyyatdan keçirilir və təsdiq edilir. Hər hansı bir qanunsuzluq var idisə büdcə xərclərinə nəzarət edən və birbaşa cavabdeh olan maliyyə orqanları bunu vaxtında aşkar edərdilər. Təhsil Nazirliyi layihə ilə bağlı hər hansı qanun pozuntusu aşkar edibsə, cavabdehlərin məsuliyyətə cəlb olunması üçün Baş Prokurorluğa müraciət etmək yerinə bizim 4 aylıq əmək haqlarımızı ödəmirlər. 

Ehtimal edirik ki, inklüziv layihənin tətbiqi üçün ayrılan maliyyə vəsaiti talan edən bir qrup məmur bu qanunsuz  hərəkətlərini ört-basdır etmək üçün “çıxış yolu”nu  bizi işdən çıxarmaqda, layihəni bağlamaqda görürlər. 

Biz qanuni qaydada işə qəbul edilmişik. Bizimlə elekton sistemə işlənmiş müddətsiz əmək müqavilələri var. Layihənin bağlanması barədə Nazirlər Kabinetinin hər hansı bir əmr yoxdur. Bu günə kimi bizimlə əmək münasibətləri davam etdirilirsə, əmək haqlarımız da ödənilməlidir. Lakin Təhsil Nazirliyi “ağına-bozuna” baxmadan bütün hüquqlarımızı pozur, maaşımızı ödəmir.

Problemlə bağlı Təhsil Nazirliyinə dəfələrlə rəsmi müraciətlər etmişik. Problemin həlli bir yana qalsın, müraciətlərimiz belə cavablandırılmır.”

Bölmənin digər xəbərləri


® 2009 FAKTXEBER.COM - Azərbaycan Onlayn Xəbər Portalı

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


ƏLAQƏLƏR

  (+994 70) 870-47-49      (+994 55) 786-96-84

  [email protected]


Valyuta.com


Рейтинг@Mail.ru