Amerikalı beynəlxalq strategiya mütəxəssisi və analitik Martin Sieff Vaşinqton rəhbərliyinin son dövrdə Türkiyə ilə yaşadığı gərginlik barədə yazıb.

FaktXəbər-in məlumatına görə, "United İnternational Press" (UIP) xəbər agentliyi ilə "Vaşinqton Times" qəzetində 24 il xarici xəbərlər müxbiri və analitik olaraq işləyən, CNN, NPR, "Fox News" və BBC-də şərhçilik edən Sieff, mərkəzi ABŞ-da yerləşən Strateji Mədəniyyət Fondunun internet saytında yaydığı məqalədə Tramp rəhbərliyinin son dövrdə Türkiyə ilə yaşadığı gərginliyin müttəfiqi olan kilid bir ölkəni itirməsinə səbəb ola biləcəyi xəbərdarlığını edib.

Sieff, "Çörçillin səhvlərini təkrar etmək: ABŞ Türkiyəni Şanxay Əməkdaşlıq Təşkilatına (ŞƏT) qoşulmağamı məcbur edir?" başlıqlı məqaləsində ABŞ-ın Keşiş Brunson böhranına görə  Türkiyəyə tətbiq etdiyi sanksiyalar, ikitərəfli ticarətdəki yeni gömrük tarifləri ilə F-35 təyyarələrinin satışının qarşısını almağa yönəlmiş qərarlarının I Dünya müharibəsi zamanı İngiltərədə Uinston Çörçillin Osmanlı İmperiyasının Almaniyanın tərəfində müharibəyə daxil olmasına yol açan yanlış addımlarına bənzədiyini yazıb.

Çörçillin o dövrdə siyasi rəhbər olaraq İngiltərə zavodlarında inşa edilən, Osmanlı İmperiyasının pulunu nağd ödədiyi 2 döyüş gəmisini vermədiyinə işarə edən Sieff, bu qərarın Osmanlının Almaniya və Avstriya-Macarıstan İmperiyası tərəfində müharibəyə girməyə məcbur etdiyinə diqqəti çəkib.

Sieff Osmanlının Almaniyadan aldığı gəmilərlə müharibəyə girməsindən sonra nəzarətində olan boğazları Antanta dövlətlərinə bağlandığı, buna görə də İngiltərə, Fransa və Rusiya arasındakı tamamlama xəttinin kəsildiyini, İngilislərin bu xətti yenidən açmaq üçün Dardanel cəbhəsində başladığı müharibənin məğlubiyyətlə nəticələndiyini xatırladıb.

Sieff ABŞ-ın bu gün Türkiyəni yadlaşdıran addımlar ataraq İngiltərənin keçmişdəki strateji səhvini təkrar etdiyini, bu vəziyyətin Türkiyəni Şimali Atlantika İttifaqıından (NATO) uzaqlaşdıraraq, ŞƏT və Avrasiya İqtisadi Birliyi (AİB) kimi Rusiyanın liderlik etdiyi rəqib beynəlxalq birlik təşəbbüslərinə qoşulmağa məcbur etdiyi xəbərdarlığını səsləndirib.

Türkiyənin hazırda ŞƏT ilə dialoq tərəfdaşı olduğuna diqqəti çəkən Sieff, həmçinin AİB ilə də azad ticarət müqaviləsi bağlamağı düşündüyünü deyib.

Martin Sieff analizini belə davam etdirib:

"Bu gün Vaşinqton Makedoniya, Çernoqoriya və Gürcüstan kimi kiçik ölkələri Estoniya, Latviya və Litva kimi başqa kiçik ölkələrin yerləşdiyi NATO Alyansına inteqrasiya etmək üçün çalışdığı bir vaxtda, Türkiyəyə ağır sanksiyalar tətbiqi məsələsi ilə mövqe göstərir. Halbuki, 63 ildir NATO ittifaqının bir hissəsi olan Türkiyə ABŞ-ın Şərqi Aralıq dənizi və Orta Şərqdəki hərbi mövqeyi baxımından həyati əhəmiyyətə malikdir. Rusiya ilə mümkün müharibə vəziyyətində ABŞ döyüş gəmilərinin Qara dənizdəki əməliyyat qabiliyyəti tamamilə Türkiyənin əməkdaşlığından asılı olacaq".