Yenə Türkiyədə terror və yenə də qan. Adi əsgərin, vətəndaşın qanı axıdılır və kimlərsə də bundan yararlanır.

Bu gün baş nazir Davudoğlu ötən gün Ankarada baş verən terror olayında kürdləri müqəssir bildi. Əlbəttə, təkcə kürdləri yox, Bəşşar Əsədi də onlara qatdı. Davudoğlu, "kürdlər Əsədlə dostluq etdiyinə görə, deməli Əsəd də bu terrorda günahkardır və elə bu baxımdan Suriya hökumətinə qarşı addım atmaq bizim haqqımızıdır" söylədi.

Əlbəttə, kürdlər Ankara olayında əli olmadıqlarını qəti şəkildə rədd ediblər. Ancaq sual ondadır ki, niyə belə bir dəhşətli terror olayı məhz bu zamana təsadüf etdi?

Hamıya məlumdur ki, Suriyada terror qruplaşmalarını dəstəkləyən Səudiyyə Ərəbistanı və AK Partiya hökuməti bu gün, bu ölkədə baş verənlərdən olduqca narahatdırlar. Suriya ordusu və könüllü qüvvələri son vaxtlar xaricdən gələn və maliyyəşən terror qruplaşamalarına qarşı uğurlu əməliyyatlar həyata keçirirlər.

Türkiyənin hazırkı hökuməti isə qonşu ölkələrə qarşı qanunsuz müdaxilələrini pik həddinə çatdırıb. İş o yerə çatıb ki, Suriyaya qarşı müttəfiq arayıb, bu ölkəyə hücum etmək niyyətindədir. Təbii ki, ABŞ-dan asılı bir ölkə onun yaşıl işığı olmadan, belə bir işi görə bilməz. Elə bu baxımdan, bir neçə gündür ki, rəsmi Ankara Suriyadakı terrorçulara yardım etməkdə uğursuzluqla üzləşib. Səudiyyə Ərəbistanı da eyni durumdadır.

Davudoğlunun bugünkü fürsəttələb çıxışı isə insanı Ankara olayı ilə bağlı düşünməyə vadar etməyə bilməz. Yadınızdadırsa, ötən parlament seçkilərinin birinci turunda ciddi səs azlığı ilə üzləşən AK Partiyanın məğlubiyyət ehtimalından sonra bu ölkədə silsilə terror aktları işə düşdü. Nəticə isə göz qabağındadır. İkinci turda AK Partiya seçkiləri uddu. Bu gün də oxşar durum, başqa bir aspektdə AKP hökumətinin məğlubiyyətlə üzləşdiyini göstərir. Ötən gün baş vermiş terror aktı, hər bir vəchlə Suriyaya girmək istəyən rəsmi Ankara üçün əsl girəvə olub. Sanki Suriyaya təcavüz etməkdə tərəfdaşsız qalan Anakara, terror aktından sonra özünü qonşu ölkəyə qoşun yeritməkdə “haqq” sahibi kimi sırımağa çalışır.

Suriyaya terrorçuluğu digər mürtəce ölkələrlə birgə AK Partiya hökumətinin gətirdiyi hamıya gün kimi aydındır. Sadəcə bu iş Qərbin də marağında olduğundan, kimsə bu ölkələrə "gözün üstə qaşın var" deyə bilmir.

Bəlkə də AKP hökuməti getdikdən sonra Davudoğlu-Ərdoğan hakimiyyətinin regionu terror vasitəsilə viran qoyduqları haqda faktlar beynəlxalq məhkmələrinin masasına çıxarılacaq.

Bizə ancaq kimlərinsə siyasəti üzündən günahsız şəkildə ölən insalara rəhmət diləmək qalır. Allah rəhmət etsin.