Gəncədəki hərbi hissədə gənc əsgərlərin andiçmə mərasimi keçirilib. FaktXəbər-in TTV-yə istinadən verdiyi məlumata görə, and içmə mərasimindən əvvəl əsgər və zabitlər üçün konsert proqramı təşkil olunub. Sonra isə andiçmə mərasiminin başlaması üçün hərbi hissənin döyüş bayrağı orkestrin müşayəti ilə meydana gətirilib.

Tədbirə qatılan Azərbaycanın Milli Qəhrəmanı, general-leytenant Rövşən Əkbərov müdafiə naziri general-polkovnik Zakir Həsənovun təbrik məktubunu gənc əsgərlərə oxuyub. Və onları ordu sıralarına daxil olmaları münasibəti ilə təbrik edib.

Hərbi hissə komandiri əvəzi Daşqın Bənnayev də əsgərlərə vətənin keşiyində mətin dayanmalarını və hərbi sirrlərə mükəmməl yiyələnmələrini tövsiyyə edib.

Hərbi andı qəbul etmək üçün gənc əsgərlər təyin olunmuş yerlərə keçiblər. Və əsgərlər vətənə sədaqət andı içiblər. Onlar vətənin keşiyində mətin dayanacaqlarına söz veriblər. Əsgərlərin valideyinləri də bu sevincli günlərində onları tək qoymayıb.

General-leytenant Rövşən Əkbərov ilk hərbi ixtisas kursunu başa vuran müddətdən artıq həqiqi hərbi xidmət keçən qadın hərbçilərə də sertifikatları təqdim edib. Onlardan bəzilərinə yeni rütbələr verilib. Mərasim hərbçilərin keçidi ilə davam etdirilib.

Mərasimdə hərbi hissənin xüsusi təyinatları bacarıqlarını göstəriblər.