"Sovetski" sakinləri üçün Bakıda, Gəncə prospektində yeni bina tikiləcəyi ilə bağlı xəbər vermişdik. Yeni layihənin “Sovetski” sakinləri üçün nəzərdə tutulduğu üçün adı çəkilən ərazinin sakinləri ilə görüşdük. “Sovetski” sakinlərinin bir çoxu bu layihədən məmnun qalsa da, tikiləcək mənzillərin 1 kvadratmetrinin 380 manatdan satılması ilə barışmırlar.
 
“Bizə kvadratı 1500 manatdan verirlər. Mənim evimin sahəsi 20 kvadratdır, bu da 30 min pul eləyir. Yeni tikilən evdən mən bu pula neçə kvadrat alım ki, hələ təmir etdirib, içinə də köçüm. Bəs 9 nəfərlik ailə ilə hara gedim?” – deyən ağsaqqal əlavə etdi ki, evinin sahəsi az olanlar üçün layihənin də xeyiri yoxdur: “Şükür Allaha, pis yaşamırıq. İt damı da desələr, quş damı da desələr, özüm üçün yaşayıram. Burdan çıxmaq fikrim də yoxdur.”
 
Xəbəri eşidən xanım deyir ki, “oradan mənzil alsam da, təmirsiz necə orada yaşayım?” Adını deməyən bu xanım bildirir ki, əlavə gəliri də yoxdur evi alıb, sonra təmir etdirsin.
 
"Sovetsi"sakinlərinin bir qismi isə deyir ki, bina keyfiyyətli olsa, onları qane etsə, niyə də ev almasınlar: “Kvadratı 380 manatdan pis deyil, baxır onun necə tikiləcəyinə. Elə olmasın ki, sabah ora gedim, sonra qalım ortada.”
 
Qeyd edək ki, “Sovetsi" sakinləri üçün Bakıda, Gəncə prospektində yeni bina tikiləcək. Bina “T” şəklində olacaq. Binada 9 blok olacaq və hər blokda 6 mənzil yerləşəcək. Mənzillər "Sovetski" sakinlərinə 1 kvadrat metri 380 manatdan satılacaq. Bu bir sosial layihədir. Mənzillər təmirsiz təqdim ediləcək və sakinlər evlərə nəğd pul ödəməklə sahib ola biləcəklər. Mənzil sertifikatlarının verilməsi də nəzərdə tutulur.