Türkiyədə keçirilən son bələdiyyə seçkilərində Ərdoğanın inamlı qələbəsindən sonra onun növbəti mərhələdə Türkiyənin prezidenti olacağına dair mövzular qardaş ölkənin gündəm mövzularından birinə çevrilib. Lakin bu prosesin hansı formada baş tutacağı ilə bağlı isə müxtəlif fikirlər səsləndirilir. 

Lakin maraqlı olan mövcud reallığı nəzərə alaraq Ərdoğan hansı formada prezident olmağa çalışacaq? Bu proses konstitusiyanı dəyişməklə baş tutacaq, yoxsa Ərdoğan mövcud Türkiyə qanunlarının prezidentə verdiyi səlahiyyətlərlə kifayətlənəcək? FaktXeber.com-un sualları ilə bağlı açıqlama verən politoloq Elxan Şahinoğlu bildirdi ki, 

Ərdoğan bələdiyyə seçkisində məğlub olsaydı və ya səslərini xeyli itirsəydi, o prezident olmaq istəklərini arxa plana atacaqdı. Ancaq o bələdiyyə seçkilərində böyük qələbə əldə etdi: “Ona görə də, Ərdoğanın prezident olmaq istəyi və şansı artıb. Məncə, o indiki prezident Abdulla Gülü geri addım atmağa və hakim partiyadan özünün prezidentliyə namizəd olacağına razı salacaq. Əslində bələdiyyə seçkisindəki qələbədən sonra bu onun hüququdur”. 

Elxan bəy onu da bildirdi ki, Ərdoğanı prezidentin indiki səlahiyyətləri qane etməyəcək: “O Konstitusiya dəyişikliklərinə gedərək, səlahiyyətləri artırılmış dövlət başçısı olmaq istəyəcək. Fransa modeli götürülə bilər, yəni hakimiyyət prezidentlə parlament arasında bərabər bölüşdürülə bilər.” 

“Ərdoğanın prezident seçilməsi Türkiyənin xarici və daxili siyasətində hansısa dəyişikliklərə səbəb ola bilər”, - sualını da cavablandıran ekspert, bunları söylədi:

“Ərdoğan prezident seçilərsə, onun daxili və xarici siyasətində ciddi yenilik edəcəyini gözləmirəm. İnsanın xarakteri necədirsə, o qısa müddətdə dəyişə bilməz. Buna baxmayaraq, prezidentlik vəzifəsi baş nazir vəzifəsindən fərqlənir. Prezident ölkə daxilində özü ilə siyasi qüvvələr arasında bərabər məsafə qoymalıdır. Məsələn, Ərdoğan hazırda baş nazir olaraq müxalifəti köşəyə sıxışdırır, onları sərt dildə tənqid edir. Ancaq prezident kreslosunda bunları etməmək lazımdır. Çünki, prezident dövləti təmsil edir. Bilmirəm, Ərdoğan rəqibləri ilə savaşmaq siyasətinə və xarakterinə son qoyacaq, ya yox, ancaq indiki üslubunu prezident kürsüsündə də davam etdirərsə, bu Türkiyənin imicinə xələl gətirə bilər.”