Xəbər Lenti

İnfoqrafika

Arxiv

Yazar


Aqil Mehdi

24 May

2013
2316
Yalana inanmaq üçün onu çox danışmaq lazımdır

ABŞ prezidenti insan haqlarından, demokratiyadan dəm vuran çıxışında uşaqların bombalanmasına haqq qazandırdı

ABŞ prezidenti Barak Obama terrorla mübarizə strategiyalarına dair açıqlamasında "bizim müharibəmiz İslamla deyil", - söyləyib.

FaktXəbər-in məlumatına görə, Milli Müdafiə Universitetində ABŞ-ın terrorizmlə əlaqədar gələcəkdəki mübarizə strategiyası ilə əlaqədar danışan Obama, Əl-Qaidə, Taliban və onlarla əlaqəli olan qüvvələrlə müharibə apardıqlarını söyləyərək, çıxışına belə davam edib: "Üz-üzə qaldığımız terrorizm ümumi bir ideologiya ilə bəslənir. O da bəzi radikallar tərəfindən ortaya atılan, İslamın ABŞ və Qərblə razılaşmadığı inancıdır. Bu ideologiya bir yalana söykənir. ABŞ İslamla müharibədə vəziyyətində deyil və sözügedən ideologiya, terror hücumların ən sıx qurbanı olan müsəlmanların əksəriyyəti tərəfindən də rədd edilir."

Terrorla mübarizə strategiyalarını açıqlayan Obama, əvvəlcə Əl-Qaidənin və ona bağlı qüvvələrin məğlubiyyətə uğradılması işinin tamamlanması lazım olduğunu söyləyib.

Daha sonra pilotsuz təyyarələrin istifadəsi barədə danışan ABŞ prezidenti, "Əl-Qaidə bacardığı qədər çox amerikalı öldürmək istəyən bir terror təşkilatıdır. Pilotsuz təyyarələrin müharibədə istifadəsi ədalətli bir qərardır, biz özümüzü müdafiə edirik", - deyib.

Məsələnin maraqlı görünən tərəfi odur ki, ABŞ prezidenti açıqlamasında terrorla mübarizədə pilotsuz təyyarələrin istifadəsini ədalətli sayaraq, hər ay Əfqanıstanda, Pakistanda günahsız şəkildə bombalanan sadə vətəndaşların, uşaqların, qadınların kütləvi şəkildə qətlinə qanuni don geyindirir. Bəs harda qaldı insan haqları?

Maraqlıdır ki, Obama İslamla müharibə aparmadıqlarını iddia etsə də, ABŞ-ın təkcə son 10 ildə yürütdüyü siyasətə nəzər yetirdikdə həqiqəti görmək mümkündür. 11 Sentyabr terrorunda Mərkəzi Kəşfiyyat İdarəsinin əli olması danılmaz fakt kimi artıq ortaya qoyulub və bunun əksini isbata cəhd ağılsızlıqdır. Məhz planlaşdırılmış şəkildə həyata keçirilən bu terror aktından sonra ABŞ-ın Şərqə, Şərqin timsalında isə İslama qarşı ideoloji hücumları açıq müharibə səviyyəsinə keçdi. Uzun illər Səddam Hüseynin əsarəti altında olan İraq Amerikanın işğalı altına keçdikdən sonra məscidlərdə partlayışlar başladı, ziyarətgahlar dağıdıldı. Sünni adı ilə şiələrə, şiə adı ilə sünnilərə hücumlar həyata keçirildi ki, qarşılıqlı mübarizə başlasın.

Daha sonra Obama Əl-Qaidə və Talibanla mübarizə apardıqlarını, bu qruplaşmanın ideologiyasının yanlış olduğunu söyləyir. Amma nədənsə bu ideologiyanın qaynağı olan, maliyyə dayağı olan və Yaxın Şərqdə ən yaxın müttəfiqi olan Səudiyyə Ərəbistanı barədə danışmır. Məgər Obama bilmir ki, Əl-Qaidə və Talibanın başı Ərəbistanın maliyyəsinə bağlıdır? Əgər doğrudan da Əl-Qaidə ilə mübarizə aparırlarsa, bəs onda Suriyada Bəşər Əsəd hakimiyyətinə qarşı müxalifət adıyla döyüşən Əl-Qaidə terrorçularına yardım edən, onların mübarizəsini dəstəkləyən, dəstək məqsədiylə konfranslar keçirən kimdir?

Bu sualların cavabını Obama bilir, amma yəqin güman edir ki, heç kəs bilmir. Çünki dünyanın aparıcı KİV-ləri onun söylədiyi fikirləri humanizm kimi, insanlığın qeydinə qalan dövlət başçısı kimi təqdim edirlər. Belə olmasaydı, Obamanın universitetdəki çıxışını bir neçə dəfə kəsən qadına, “söz azadlığıdır, sizin danışmaq haqqınız var, buyurun danışın, mən sizi dinləyirəm”, - deməsini qabardaraq, daha sonra “sizin fikirlərinizin bəzisinə qatılmasam da, demokratiya üçün bu cür fikirləri dinləmək lazımdır” fikirlərini geniş şəkildə yayımlamazdılar. Amerika doğrudan da demokratiyaya bu qədər önəm verirsə, bunu əməli ilə həyata keçirməlidir. Uzağa getmirəm, Qarabağın Azərbaycan torpaqları olduğu danılmaz faktdır, aksiomadır. Amma ABŞ-ın 907-ci düzəlişi, işğalçıya hər il milyonlarla dollar yardım etməsi, qondarma bir rejimə də yardım əlini uzatması, ATƏT-in Minsk Qrupu çərçivəsində həftə səkkiz mən doqquz regiona turist səfərinə çıxması, guya regionda təhlükəsizliyin regionda onun üçün hər şeydən üstün olmasını söyləməsi, amma altdan-altan neftimizi daşıyıb aparması göz önündədir.

Əgər doğrudan da hansısa ölkənin təhlükəsizlik onun üçün bu qədər önəmlidirsə, onda buyursun, çıxarsın qoşunlarını müsəlman ölkələrindən, qoy sabitlik təmin olunsun. Yoxsa, “İraqdan qoşunu çıxarmışam”, - deyə açıqlamalar tirajlayır, amma ABŞ-ın İraqdakı səfirliyində 22 min nəfərdən ibarət heyətin nə işlə məşğul olduğun söyləmir.

Qısası, ABŞ “İslamla” yox, məhz İslamla müharibə aparır. Yoxsa, İslamın Konstitusiyasını - Qurani-Kərimi təhqir edərək yandıranı, Peyğəmbərə ləkə atmaq istəyənləri “söz azadlığı” adıyla müdafiəyə qalxmazdı.

Bölmənin digər xəbərləri


® 2009 FAKTXEBER.COM - Onlayn Xəbər Portalı

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


24-06-2018 08:57



  (+994 70) 870-47-49       (+994 55) 786-96-84

  [email protected]

Valyuta.com