Xəbər Lenti

İnfoqrafika

Arxiv

Yazar


Aqil Mehdi

17 Aprel

2012
3058
BAKININ LİFTLƏRİ, FÖVQƏLADƏ HALLAR NAZİRLİYİ, LİFT İDARƏSİ VƏ 150 MANAT PUL

Ölkədə hər gün izlədiyim bir neçə nazirlik saytı var ki, onların da başında Fövqəladə Hallar Nazirliyinin saytının gəldiyini desəm, səhv etmərəm. Gün ərzində baş verən hadisələrə diqqət edirəm. Ən çox diqqətimi çəkən isə liftdə qalanlardır. Çünki bir dəfə - Bakıda baş verən güclü zəlzələ zamanı özüm də liftdə qalmışam. Təsəvvür edin ki, liftdə qalanlarla bağlı nazirliyin 112 xidmətinə 1-10 aprel tarixlərində müraciət edənlərin sayı ən azı 20 nəfərdir. Və bu müraciətlərin əksəriyyətində də liftin texniki nasazlıq üzündən içində adam qaldığı məlum olur. Təbii ki, bu müraciətlərə baxmayaraq, lift idarəsi ilə əlaqə saxlasaz, hər şeydən danışacaqlar, amma liftlərə niyə heç olmasa ayda bir dəfə texniki baxış etmədikləri ilə bağlı suala cavab verməyəcəklər.

Keçən sözün məmmədalısına. Demək bu gün səhər evin balacasını dərsə apararkən, onun hazırladığı maketin evdə qaldığını binanın həyətinə çatarkən fərq etdik. "Qalsın, sabah apararsan", - dedim, amma bu gün müəllimin soruşacağını deyib, geri qayıtdı. Dünən axşamdan yeri-göyü titrədən liftin səs-küyünə baxmayaraq, liftlə qayıdası oldu. Təxminən 5 dəqiqə gözlədim, amma  balacadan səs-soraq yox idi. Bu vaxt həyətə düşən qonşu, "deyəsən sizin uşaq liftdə qalıb". - dedi. Təsəvvür edin, çiynimdə Misir Mərdanovun Azərbaycan uşaqlarının qəddini əyən ağır dərs kitabları ilə dolu çanta yaxınlaşıram liftə. Birinci mərtəbədən çağırıram: "Leyla, burdasan?". Səs gəlmir. Və paralel olaraq FHN-nin 112 xidmətinə zəng vururam. Dəstəyi götürən xanıma filan ünvanında liftdə uşaq qaldığını söyləyirəm. Pilləkənlə qalxıram 5-ci mərtəbəyə. Yenə soruşuram: "Leyla, burdasan?" Səs gəlmir. 112 xidmətindəki növbətçi xanımla da danışığım dayanmayıb. O, məndən soruşub anket doldurur: adınız, soyadınız, yaşadığınız ünvan, telefon nömrəsi, hadisə baş verən ünvan, blokun nömrəsi, uşağın qaldığı mərtəbənin nömrəsi, binanın yaxınlığında nə var, hansı rayonun ərazisidir... Və bu sualları cavablandıra-cavablandıra, təngnəfəs, kitablarla birlikdə qalxıram 7-ci mərtəbəyə, "Leyla, burdasan" soruşuram. Səs gəlir, "burdayam" deyir. Operator xanım isə bir ucdan soruşur. Yadımda deyil, deyəsən artıq, sonuncu dəfə mobil telefona yüklədiyim kartın seriya nömrəsini soruşurdu. Və telefonun qırmızı düyməsini basıram. Amma xanım israrla danışmaq istəyir. Özü zəng vurur. "Qardaş, bilirəm, valideynsiz, həyəcanlısız, amma biz bunları soruşmalıyıq", - deyir. Və mən də sual edirəm ki, bu necə xilasetmə xidmətidir ki, söylədiyim ünvanın yaxınlığında hələ bir nə olduğunu, söylədiyim prospektin hansı rayona aid olduğunu və sair soruşur?

Maraqlıdır, görəsən biri zəng edib, "filan küçəyə bomba qoyulub" desə, ondan da sorğu-sual edib küçənin harada yeləşdiyini, bombanın hansı daşın altına qoyulduğunu soruşacaqlar, yoxsa əllərinin altında olan kompüterdə dərhal yazıb həmin küçənin hansı əraziyə aid olduğuna baxacaqlar?

Nə isə, operatorun sonuncu sualına cavab verməyərək, ona sadəcə olaraq, "sizin köməyinizə ehtiyac qalmadı, qonşuların köməyi ilə uşağı liftdən çıxardıq", - dedim.

Və qərara aldım ki, işə çatan kimi lift idarəsinə zəng vurub deyim, gəlib bu zəhirmara qalmış liftə əncam çəksinlər. Amma çifayda. Gün ərzində lift idarəsindən zənglərimə cavab verən olmadı, yəqin ki, əl-ələ verib mikrorayon tikməyə gediblərmiş. Axşam yorulanda isə yollarını bizim binadan salıblar. Gəlib bir qədər qurdalanıblar sonra da qonşulara deyiblər ki, "liftin təmiri üçün 150 manat yığın gəlib düzəldək".

Səhərə kimi yata bilməmişəm. Fikirləşirəm ki, qonşularımız, yəni binanın ilk 8 mərtəbəsi 1 qəpik də verməyəcək ki, "bizə lift lazım deyil", elə liftdən istifadə üçün aylıq ödənişi də o cür edirlər. Yerdə qalır 2 mərtəbə və 4 qonşu. Qonşuların biri kirayədə qalanlardır, Amacinin qohumlarıdır, dillərini də bilmirik. Qaldı 3 qonşu və 150 manat pul.  Amma söhbət bu 150 manatdan getmir, söhbət ondan gedir ki, milyardlarla büdcəsi olan bir ölkədə ki, lift xarab olanda onu vətəndaşın cibinin pulu ilə düzəldirlər, onda bu xaraba qalmış lift idarəsində 5-6 mexanik, müdir, müdir müavini saxlayıb dövlətin büdcəsini niyə dağıdırlar? Elə o mexaniklərin birinin adını yazsınlar liftin divarına, biz də lift xarab olanda o yetimi çağıraq, liftimizi düzəltdirək, cibinə də 5-10 manat pul qoyaq. O da dua edib getsin. Elə bu qədər.

Bölmənin digər xəbərləri


® 2009 FAKTXEBER.COM

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


23-07-2019 01:08



  (+994 55) 786-96-84

  [email protected]

Valyuta.com

Рейтинг@Mail.ru