Xəbər Lenti

İnfoqrafika

Arxiv

Yazar


Emilya Vaqif

30 May

2009
1757
Tətili təhsillə bəzəyək

Biz hər gün bir az daha çoxalan gənc bir əhali potensialına sahibik. Əlbəttə, bunun özü böyük nemətdir. Ancaq bu cür böyük bir nemətin qiymətini yaxşı qavramağımız və qiymətləndirə bilməyimiz üçün təcili tədbirlər görməliyik. Hazırda insani və əxlaqi dəyərlərin hər gün bir az da pozulduğu bir zaman kəsiyindən keçirik. İnsanlıq üçün faydalı olanlara bu gün daha çox ehtiyacımız vardır.

Əlac isə yalnız təhsildədir.

Lakin müqəddəs Kitabının ilk əmri "oxu" ("Ələq", 1) olan, "bilənlərlə bilməyənlərin bərabər olmayacağı" ("Zumər", 9) həqiqəti elan edilən və "bilmirsinizsə bilənlərə soruşun" ("Ənbiya", 7) vəzifəsi verilən bir dinin mənsubları olan bizlər, təəssüflər olsun ki, təhsil, elm mövzusuna lazımınca qiymət vermir, ya da onu ikinci plana salır və bunun üçün ağır güzəranı bəhanə gətiririk. Yaxşı, bəs "çətin zəmanənin" səbəbi nədir və ya kimdir, heç düşünübsünüzmü? Övladlarımızın savadsızlığı, cahilliyi onların gələcəyi üçün məhək daşı olmayacaqmı?

Aləmlərə rəhmət olaraq göndərilən Peyğəmbər məclisdə oturub elmini artırmayan kəsin Allahdan uzaqlaşdığını bildirərək, elm axtarışında olan şəxsin ruzisini Allahın yetirdiyini demişdir. O, təlim və təhsil mövzusunda hər imkanı qiymətləndirmiş və bu mənada sanki səfərbərlik elan edərək, ən gözəl nümunə olmuşdur. Həzrət Məhəmməd hətta müsəlman uşaqların məlumatlı böyüməsi üçün əsirlər arasındakı oxuma-yazma bilənlərdən belə faydalanmışdır.

Övlad - insan üçün bu dünyada verilən ən böyük nemətdir. Ancaq Allahın bu lütfünün dəyər və qiymətini onları yaxşı insan olaraq yetişdirməklə ödəyə bilərik. Bunun üçün onlara ilk olaraq İslamı öyrətməliyik. İmam Sadiq (ə) buyurub: "Düşmənlər sizi qabaqlayıb övladlarınızı azdırmamış, onlara din barəsində hədislər və İslam maarifini öyrədin". İslami maarif cəmiyyətin bərqərar olması üçün yaxşı insan, kamil müsəlman yetişdirməyi də qarşısına məqsəd qoyub və bununçün uşaqlarımıza hələ kiçik ikən təhsil verməyi məsləhət görüb. Çünki, dünya və axirətin xoşbəxtliyi olan bir işdə gecikməyin özü də aldanmaqdır. Məhz bu səbəbdən Həzrət Məhəmməd beşikdən qəbrədək elm axtarışında (öyrənməkdə) olmağı tövsiyə etmişdir.

Hazırda demək olar ki, hamının evində yeniyetmə və gənc uşaqlar var. Və bu ailələrdən bir qismi yuxarıda dediyim kimi çətin güzəranlarını bəhanə gətirərək övladlarını oxutmur, bəziləri də uşaqlarına ancaq dünyəvi təhsil verməklə kifayətlənir, İslami qayda-qanunları öyrənmələrinə isə "dərsləri ağırdır", "qabaqdan imtahanlar gəlir" və sair bəhanələrlə mane olurlar. Beləsə, heç olmasa qarşıdan gələn qısa fürsətlərdən lazımınca istifadə etmək lazımdır. Məsələn, üzümüzə gələn yay istirahətini - həm tətil, həm də təhsil şəklində qiymətləndirməyi planlaşdıraq, heç olmasa bu kiçik müddət ərzində müxtəlif şəhər və qəsəbələrdə açılan kurslarda uşaqlarımızın din, insani və əxlaqi vəzifələrini öyrənmələrinə çalışaq. Beləliklə övladlarımız daha məlumatlı, əxlaqlı, insanlığa daha faydalı olarlar. Unutmayaq ki, ən böyük düşmənimiz cəhalət, ən böyük narahatlığımız isə əxlaqi pozğunluqdur.

Bölmənin digər xəbərləri


® 2009 FAKTXEBER.COM

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


21-08-2019 22:00



  (+994 55) 786-96-84

  [email protected]

Valyuta.com

Рейтинг@Mail.ru