Xəbər Lenti

İnfoqrafika

Arxiv

Yazar


Aqil Mehdi

05 İyul

2010
2677
SAMİR SƏDAQƏTOĞLU, RAFİQ TAĞI, ELDƏNİZ ELGÜN...

 

Dünən bir, bu gün iki, sabah üç... və sair və ilaxır. Onların sayı bir-bir atır. Və fəaliyyətləri də uzun olmur. Bir müddət göstərdikləri fəaliyyətə görə, Amerikadan, Avropadan, Soros Fondundan qrant alırlar. Cani-dildən fəaliyyət göstərirlər. Amma nədənsə tez sönürlər. Nədənini yəqin ki, özləri də bilir. Onlar və onların himayədarları dəqiq bilirlər ki, bu xalqın imanını pulla satın almaq olmaz, dəyişdirmək də olmaz. Sadəcə bir-iki nəfərdə bəzi şübhələr yarada bilərlər ki, bu da onların dindən, İslamdan uzaqlaşmasına yox, yaranan şübhələrinə cavab üçün alimlərə müraciət etməyə yönəlir.

Nə isə, keçək əsas mövzuya. Bir müddət əvvəl Peyğəmbəri təhqir etməyə cəhd göstərmiş "Sənət" qəzetinin davamı olaraq, "Unikal" adlı bir kağız parçası da bu yolla getməyə qərar verib. Qərar verməsi bir yana, hətta onu himayə edənlərin kimliyi bilinməsə də, onlara o qədər arxayındır ki, kimlərisə təhdid etməkdən belə çəkinmir.

Artıq bir neçə nömrədir, İslam düşməni Salman Rüşdünün "Şeytan ayələri" kitabının dərcinə başlayan qəzetin rəhbəri Eldəniz Elgünün məqsədi tamamilə aydın görünür. (Daha doğrusu yazının sifarişinin hansı səfirlikdən verildiyi aydın görünür) Başı kolda olmasına baxmayaraq, quyruğunun çöldə qalmasının fərqində deyil. Fikir verin, Eldəniz Elgün hay-küylə qəzet buraxır, amma qəzetinin bir nəfər də işçisi yoxdur. Qəzet tamamilə imzasız yazılardan ibarətdir. Bu isə onu göstərir ki, bu qəzet də digəriləri kimi sadəcə bir neçə məqalə dərc edib, ölkədəki sağlam mənəvi düşüncəni sarsıtmağa yönəlib. Ki, bu da başqaları kimi ona da müyəssər olmayacaq.

Yaxşı yadımdadır. İlk əvvəl "Sənət" qəzetində sözügedən yazı dərc edildikdə, bir neçə nəfər mömin qəzetin rəhbəri Samir Sədaqətoğlu ilə stol arxasında oturub söhbət etmək qərarına gəldilər. Bu məqsədlə ona zəng vurdular və Yazıçılar Birliyinin binasının 3-cü mərtəbəsində çayxanada oturub söhbət etdilər. Razılaşdılar ki, yazının dərci dayandırılsın. Amma baxın sonra nə oldu. Samir Sədaqətoğlu elə növbəti saydaca yazdı ki, dindarlar məni ölümlə təhdid edirlər. İndi Eldəniz Elgün də həmin yolu gedir. "Redaksiyamıza sabah səhər 11-də basqın edəcəklər" deyə fəryad qoparır. Qalır bir dənə sabah qul bazarından 5-10 nəfər tutub gətirib redaksiyanın altını üstünə çevirtdirib "Bizə basqın etdilər" - deyə mətbuat konfransı keçirmək.

Eldəniz bəy! Özünə hörmət edən kəs, belə ucuz şoularla, İslamı təhqirlə ailəsinə çörəkpulu qazanmaz. Ən azından ona görə ki, bu günə kimi heç kəs bu yolla qazandığı pulu axıra kimi yeyə bilməyib. Əgər inanmırsansa bu sahədə təcrübəsi olan Rafiq Tağıdan məsləhət ala bilərsən.

Hərçənd elə mən inanıram ki, sənə bu sahədə Rafiq Tağı məsləhət verir. Deyir Samirlə mən edə bilmədim indi sən davam et.

Adətən polislər cinayəti araşdırarkən ilk öncə "Vuran qaçar, vurduran gələr" prinsipinə üstünlük verirlər. Eldəniz Elgünün qəzetinə dəstək məsələsində də belə oldu. Daim Azərbaycanda dini qarşıdurmalar yaratmaqda maraqlı olan "Azadlıq" radiosu dərhal Eldəniz Elgünü və Rafiq Tağını studiyalarına dəvət etdilər. Onlar da oradan dolayısıyla "əcəb etmişik" mesajını verdilər. Bu sahədə birbaşa günahkar olan Dini Komitə isə yenə də susur. Cənab Hidayət Orucov, icazə verin şübhələnək ki, bu yazının sifarişi birbaşa sizin idarədən verilib. Yoxsa, adi bir qəzetin ölkədə böyük əksəriyyətin dini inancını təhqir etməsinə və onun da rəhbərliyinin əl-qol sallayaraq "Ağanəzərəm, belə gəzərəm" prinsipi ilə meydan sulamasına və sizin də buna seyrçi qalmağınıza başqa ad vermək olmaz.

Şəxsən mənim üçün maraqlıdır ki, bütün dünyada ümumiyyətlə İslam vurulur, amma Azərbaycanda İslamın məhz şiə məzhəbi vurulur. Eldəniz kimilər heç vaxt Azərbaycan gənclərinin elmini istismar edən qondarma nurçuluqdan, vəhhabi terrorçularından yazmırlar. Onların Azərbaycan üçün hansı bəlalar gətirdiyinə diqqət etmirlər. Amma yüz illərdir formalaşmış dini inancımızı təhqir edirlər. O dini ki, onların ata-babaları da məhz həmin dində olublar. Belə çıxır ki, onda Şah İsmayıl Xətailər, Cavad xanlar, Nizamilər, Füzulilər, Nəsimilər, Vidadilər, Vaqiflər, Şirvanilər, Sabirlər, elə Eldənizlərin ata-babaları da səhv ediblər, Quran oxuyublar, gərək hillarilərin dediyi ilə otutub-duraydılar. Necə ki, indi nəvələri oturub dururlar, sarıqulaqların diktəsi və pulları ilə həm özlərinin, həm də xalqın milli-mənəviyyatını satırlar, məhv etmək istəyirlər

Bir də ki, qəribə olan başqa məsələdir. Görəsən nəyə görə, Azərbaycanda İslam təhqir ediləndə daim şiə məzhəbi narahatçılığını bildirir? Heç əsl İslamı yaydıqlarını iddia edən nurçular, vəhhabilər etiraz etmirlər. Peyğəmbər təhqir olunur susurlar, Quran təhqir olunur susurlar. Bəs harada qaldı onların İslam təəssübkeşliyi?

 

 

  

Bölmənin digər xəbərləri


® 2009 FAKTXEBER.COM

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


17-07-2019 00:45



  (+994 55) 786-96-84

  [email protected]

Valyuta.com

Рейтинг@Mail.ru