Xəbər Lenti

Sorğu

İnfografika

Arxiv

31 Oktyabr

2016
11:10
731
"Ermənilər toplum şəkildə məsuliyyət daşıyır"
Zahid Orucun ermənilər barədə dediklərinə Akif Nağıdan cavab gəldi

İqtidaryönlü deputat Zahid Orucun parlamentin son iclasında ermənilərlə bağlı təklifi geniş müzakirələrə səbəb olub. Deputat bildirib ki, biz bizə qarşı döyüşən və ya döyüşmüş ermənilərlə Azərbaycanın ərazi bütövlüyünü tanıyan ermənilər arasında fərq qoymalıyıq.

Z.Oruc Azərbaycan qanunlarına, konstitusiyasına hörmət edən, Şəhidlər Xiyabanında baş əymək istəyən ermənilərin Bakıya gəlişlərinə icazə verilməsinin vacibliyini vurğulayıb: “Biz səngərdə dayanan erməni ilə mülki ermənini ayırmalıyıq. Bu yaxınlarda da gördük ki, İsveçrədə mühacirətdə yaşayan Vaqe Avetiyan Bakıya gəlmişdi, ermənilərin törətdiyi əməllərə görə üzr istəmişdi və Şəhidlər Xiyabanını ziyarət etmək istəyirdi”.

Deputatın bu təklifi birmənalı qarşılanmayıb. Doğrudur, təklifin lehinə çıxanlar da var, amma əleyhinə çıxış edənlər də kifayət qədər çoxluq təşkil edirlər. 

Qarabağ Azadlıq Təşkilatının (QAT) sədri Akif Nağı deputatın fikirlərinin yanlış olduğu düşüncəsindədir: “Biz erməniləri bölə bilmərik ki, hansının Qarabağın işğalında rolu olub, yaxud olmayıb. Mən həmişə demişəm ki, bütün ermənilər toplum şəkildə Qarabağın işğalında məsuliyyət daşıyırlar. Bunu kifayət qədər də sübut edə bilərəm. Onların içərisində elə mülki vətəndaşlar var ki, erməni hərbçilərindən çox Qarabağın işğalında cinayət törədiblər, Zori Balayanı misal çəkə bilərəm. Bu baxımdan o cür axtarışlara çıxmağın mənası yoxdur. Belə fikirlər də var ki, guya kimlərsə Azərbaycanın ərazi bütövlüyünü, Xocalı soyqırımını tanıyır. Bunlar da yanlış fikirlərdir. Azərbaycanın torpaqları işğal altındadır. Nə qədər torpaqlarımız işğal altındadır, ermənilərlə hər hansı bir təmas yolverilməzdir. Ümumiyyətlə, yaxşı erməni ifadəsi yoxdur. Bu baxımdan onların Azərbaycana gəlişlərinə icazə verilməsi hər bir halda qəbul oluna bilməz. 25 ildir bu işğal davam edir. Bu illər ərzində bir nəfər səviyyəli erməni görmədik ki, torpaqlarımızın işğalını pisləsin. Yaxud bir erməni təşkilatı belə görmədik ki, öz hökumətlərinin işğalına qarşı açıq şəkildə çıxış etsin. Bu cür məsələlərin ortaya atılması, yumşalma meyllərinin olması yolverilməzdir və Azərbaycanın maraqlarına cavab vermir. Torpaqlar işğaldan azad olunduqdan sonra hər hansı bir proseslər başlaya bilər”.

QAT sədri təşkilat olaraq təkliflə bağlı atacaqları addımlardan da söz açdı: “Zahid Oruc deputatdır və təklif verib. Düşünürəm ki, təşkilat səviyyəsində bununla bağlı hansısa bir addım atmağa ehtiyac yoxdur. Sadəcə, mətbuat vasitəsilə mövqelərimizi deyirik. Onun verdiyi təklifin mənasız olduğunu əsaslandırırıq. Heç kəs o prosesə qoşulmamalıdır. Əgər bu təkliflə qoşulanlar olarsa, o zaman bizim hər hansı bir addımlarımız olar. O proseslərin qarşısını almağa çalışarıq. Şükürlər olsun ki, indiyə qədər belə proseslərin qarşısı dəfələrlə alınıb. Artıq ermənilərin Azərbaycana gəlib hansısa bir tədbirdə iştirak etmələri yox dərəcəsindədir. 5-6 il əvvəl ermənilər Bakıda keçirilən tədbirlərə dəvət olunurdular. Amma indi bu hallar aradan qalxıb. QHT-lərin layihələr çərçivəsində erməniləri bura dəvət etmələri də sıfır vəziyyətindədir. Təzədən bu prosesləri dirçəltməyə çalışırlar. O da faktdır ki, beynəlxalq mərkəzlər bu prosesə ciddi şəkildə maliyyə ayırırlar. Həmin maliyyəni bunlar əldə etmək istəyirlər. Əgər sözlərini keçirməyə cəhd etsələr, onun qarşısı dərhal alınacaq”.

A.Nağı bu cür təkliflərin meydana çıxmasının arxasında duran niyyətlərə də toxundu: “Ola bilər ki, bunun arxasında Azərbaycanın sülhpərvər ölkə olması və digər amillər dursun. Amma bu diplomatik gediş olsa da, hadisənin mahiyyətinə uyğun təklif olmalıdır. Əgər sülhpərvər olduğumuzu göstərmək istəyiriksə, o zaman təklif verilməlidir ki, torpaqlarımız tamam azad olunsun, öz doğma vətənlərindən didərgin düşənlər geri qayıtsınlar, ondan sonra veriləcək statusdan söhbət gedə bilər. Necə olur ki, 50 min erməniyə veriləcək status gündəmə gəlir, amma 300 min azərbaycanlıya verilməli olan statusdan söhbət getmir? Məsələlər bu səviyyədə qoyulmalıdır. Kiminsə göstərişi ilə deputatlar sülhpərvərliklərini göstərə bilərlər. Digər tərəfdən, hansısa deputatın gündəmə gəlmək üçün şəxsi təşəbbüsü də ola bilər. Hər iki versiya mümkündür. Amma bu təklif Zahid Orucun öz şəxsi təşəbbüsü ola bilməz. Görünür göstəriş verilib. Amma istənilən halda hesab edirəm ki, uğursuz cəhddir”.(musavat.com)

Xəbərlərimizi Faktxeber.com-un facebook səhifəsində də izləyə bilərsiniz.
Məqalədə : Akif Nağı Zahid Oruc  
Bölmənin digər xəbərləri


® 2009 FAKTXEBER.COM - Azərbaycan Onlayn Xəbər Portalı

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


ƏLAQƏLƏR

  (+994 70) 870-47-49      (+994 55) 786-96-84

  [email protected]


Valyuta.com


Рейтинг@Mail.ru