Bəşəriyyət bu gün cəhalət aləmindən çıxıb elm, inkişaf, hidayət, səadət və xoşbəxtlik zamanına daxil olur.

Şeytan və şeytansifətlər bu İlahi fəziləti hiss edir və elə bir fəryad çəkirlər ki, məğrib və məşriqdə eşilir. Amma artıq gecdir, Allah-taala insanları cəhalət alimindən nura tərəf və Quran nuru ilə bütün bəşəriyyəti Qiyamətə qədər hidayət etməyi iradə etmişdir. Allah-taala Quranda bu haqda buyurur: "Allah (Ona) iman gətirənlərin hamisidir, onları zülmətdən çıxarıb işığa tərəf yönəldər. Kafirlərin hamısı isə Tağutdur (şeytanlardır). Onları (kafirləri) nurdan ayırıb zülmətə salarlar." ("Bəqərə" surəsi, 257)

Məkkədə Həra dağında ilk Quran ayəsi nazil olur. Allah-taala buyurur: "(Ya Peyğəmbər!) Yoxdan yaradan Rəbbinin adı ilə oxu! O, insanı laxtalanmış qandan yaratdı. Oxu! Sənin Rəbbin ən böyük kərəm sahibidir! O Rəbbin ki, qələmlə (yazmağı) öyrətdi." ("Ələq" surəsi, 1-4)

Qeyd olunan ilk Quran ayələrində istər elmi və istərsə də mənəvi cəhətdən çox ecazkarlıq açıqlamaq olar. Biz yalnız, ilk nazil olan ayədə müasir zaman elmindən də yüksək səviyyədə olan elmi bir nöqtəni qeyd etmək istərdik. Ümidvarıq ki, bu gün İslam Peyğəmbərinə (s) nazil olan bu ilk Quran ayəsindən möminlər və insaflı alimlər ibrət alıb imanlarını daha da artıracaq və bunun müqabilində bəzi qəlb gözləri tutulmuş korlar isə yenidən təfəkkür edib müqəddəs Quran haqqında böhtan yazmaqdan əl çəkəcəklər.

O da bundan ibarətdir ki, on dörd əsr əvvəl ilk nazil olan surədə ("Ələq" surəsində) Allah-taala kamil bir zərifliklə, insanları hidayət etmək halətində elə bir incə və elmi mətləbə işarə edir ki, bəşər elmi həmin elmi mətləbi min ildən sonra kəşf etmiş və müasir zamanda belə bir elmi mövzu tam şəkildə yalnız, ən çox inkişaf etmiş elektron texnikalara ilə ələ gələ bilər.  Allah-taala ilk nazil etdiyi ayədə buyurur: "Yoxdan yaradan Rəbbinin adı ilə oxu! O, insanı laxtalanmış qandan yaratdı." ("Ələq" surəsi, 1,2)

Bu gün insanşünaslıq və insan rüşeymi elmi ilə məşğul olan ən dahi alimlər Quranın bu ayəsi müqabilində diz çökür və iqrar edirlər ki, 1400 il bundan əvvəl heç bir müasir texnikadan xəbər olmayan bir zamanda və mikrsokop kəşf olunmamışdan təxminən, mil il əvvəl, müqəddəs Quranda insanın ilk yaradılış prosesinə tam elmi şəkildə işarə olunur. Məsələ burdadır ki, bu sahənin bütün alimlərinin nəzərinə əsasən, insan rüşeyminin ana bətnində "laxtalanmış qan şəkilində olması" vəziyyətini yalnız və yalnız, müasir elmi texnika, daha doğrusu ən çox inkişaf etmiş mikroskop və ya kompyuter sistemi vasitəsi ilə görmək və müşahidə etmək mümkündür və adi gözlə rüşeymin bu vəziyyəti (laxtalanmış qan) müşahidə etmək qeyri-mümkündür.

   Qeyd etmək yerinə düşər ki, məhz Quranın bu ilk ayəsini mütaliə edən bu sahənin insaflı alimləri kəlmeyi-şəhadətini demiş və İslama daha doğrusu, Allah-taalanın varlığına iman gətirib müsəlman olmuşlar. Bu haqda sonrakı yazılarımızda söz açacağıq. İnşallah!