"Sual?"
Suallar insan həyatını nə qədr əhatə
edir, bilirsinizmi?! Insan gün ərzində neçə dəfə suallarla üz-üzə
qalır? Neçə sualı cavablandırmalı olur? Neçə suala cavab tapa bilmir?
Bunların sayı-hesabı yoxdur.
Bizim gün ərzində rastlaşdığımız
suallar müxtəlif olur. Bəzi suallar olur ki, cavabı elə sualın özündə
gizlənir, sadəcə suala bir az diqqətli yanaşmaq lazımdır ki, cavabını
tapasan. Bəzi suallar da olur ki, bir ömür düşünsən belə ona cavab tapa
bilməyəcəksən, çünki, cavabı əsla yoxdur. Bəzi suallarla da raslaşırıq
ki, onlar cavab vermək üçün yox, sadəcə içinə, daxili aləminə qapılıb
düşünmək üçündür. Yersiz, mənasız suallar da az olmur doğrusu.
Qurani-kərimin hər şeyi olduğu kimi
insana verdiyi sualları da mənalı, dərin və hikmətlidir. Təbii ki,
hikmət və elm sahibi olan Allah bu tip sualları insan övladına hər
hansı bir cavab almaq üçün deyil, onu silkələmək, yuxudan oyatmaq,
düşündürmək üçün ünvanlamışdır. Axı müqəddəs Quran həm də "zikr" -
düşündürən kitabdır.
Quranımızın bütün bəşəriyyətə
ünvanladığı suallardan biri də Təkvir surəsinin 26-cı ayəsində öz
əksini tapmışdır. Belə ki, o ayədə Ulu Allah bütün bəndələrinə xitabən
"hara gedirsiniz?!" - deyə müraciət etmişdir. Necə də dərin, dolğun,
düşündürən və ayıldan sualdır, deyilmi?
"Ey bəndəm, bu tutuşla ki, tutmusan
hara gedirsən?" - deyir sanki. Bəndə başını salıb aşağı nə sağa baxmır
nə sola, elə hey gedir. Axı hara?! Bir başıvı qaldır, gör hara aparır
bu yol səni? Bu yolun axırı varmı, yoxmu? Tutduğun bu yol səni məqsədə
çatdıracaqmı? Xoşbəxt olacaqsanmı sonunda?
Bu sadaladığımız kiçik-kiçik suallar o böyük "hara gedirsiniz?" sualının altında gizlənmiş saysız-hesabsız suallardandır.
Tez fikirin kafirlərə, fasiqlərə, ev
yıxanlara, qan tökənlərə və s. getməsin! Bu sual özünü Onun bəndəsi
sayan hər bir kəsə aiddir. Eləcə də sənə.
Işindən, sənətindən, vəzifəsindən
asılı olmayaraq hər kəsə tuşlanıb bu sual. Ey nazir, ey polis, ey
müəllim, ey həkim, ey fəhlə, ey dindar,.. hara gedirsən, de görək!?
Heç düşünmüsənmi ki, hara gedirsən?
Təbii ki, xeyir.
Zaman-zaman bu haqda düşünsəydin dünyamız bu gündə olarmıydı səncə?
Qədimdəkilər sonunda hara
getdiklərini, kimin önündə dayanacaqlırını çox yaxşı bildiklərinə görə
bu gün sənin gözünü belə qırpmadan etdiyin bir çox əməlləri etməzdi
onlar. Ona görədə bu gündə deyildi dünyamız o zaman.
Indi dünyanın o başında yer insanın
ayağı altında dayanmaq istəmir artıq, "mən belə insana məskən ola
bilmərəm!" - deyir. O zəlzələləri, vəlvələləri eşitmirsənmi? Bir gün o
başda olanlar bu başda da olmağa başlasa nə olacaq səncə, nə edəcəksən,
heç düşünmüsənmi?
Elə isə, düşün! Düşün ki, o zaman
bir çoxları bu böyük bəlanın dəhşətindən vəhşətə gəlib heyran,
sərgərdan qalıb hara getdiklərini bilmədiyi zaman sən nə edəcəyini,
hara getdiyini çox yaxşı biləsən!
Düşün və gör hara gedirsən?!
|
