Son zamanlar Vətənimiz ağır və dərdli günlərini yaşayır. Əhalisinin  95%-i müsəlman olan bir xalq bilmir ki, gördüklərinə inansın ya eşitdiklərinə! Görəsən nələr baş verir bizdə?! Hara gedirik, müsəlmançılığa, mənəviyyata, paklığa və azadlığa tərəf, yoxsa təzədən kommunist hökumətini gətirib məscidləri anbar etmək istəyirik?!

Bu gün Vətəndə, iqtisadi vəziyyəti gündən-günə ağır vəziyyətə düşən xalqın qayğısına qalıb, hər bir vasitə ilə onları həmrəyliyə, birliyə, Quran ətrafında birləşməyə və ən mühümmü islamın təcavüzkar düşmənə qarşı buyurduqlarını şüar edib, Vətənin müdafəsinə hazırlamaqdansa, bir sıra qoluzorlular öz güclərini, dindar və mömin müsəlmanların üzərində sınamağa başlayıb. Bir dəstə məmurun, xalqın qeyrətli, namuslu və mənəviyyatın keşiyində dayanmış müsəlmanlarla belə rəftarı heç bir məntiqə sığmır və qəti şəkildə qəbul edilməzdir.

Bu gün xalqın malın müxtəlif ünvanlarla basıb yeyən, acları təpiklər altına salıb haqqın verməyən, ev-eşiyindən didərgin düşmüş qaçqınların problemələrinin həllində səhlənkarlıq edən, şəhidlərin və şəhid ailələrinin haqlarını lazımınca qorumayan, ölkədə ayaq tutub yeriyən rüşvətxorluğun qarşısını alıb onlarla mübarizə aparmayan, ölkəyə kənardan bir kiloqram bela ərzaq, mal və sair gətirməsinə imkan verməyən bəzi inhisarçı qolçomaqlarla mübarizə aparıb xalqın qayğısına qalmaqdansa, bir dəstə dövlət məmurları, dinə, məscidlərə, dindarlara və ən başlıcası son günlər yayılan bəzi xəbərlərə görə MÜQƏDDƏS KİTABIMIZ QURANİ-KƏRİMƏ qarşı mübarizəyə başlayıblar.

Vətənimizin ən ağır tarixini yaşadığımız bir dövrdə, ölkəsinin ərazisinin 20%-i düşmən tapdağı altında olan bir ölkə məmurlarının belə özbaşnalığını tarix heç bir bəhanə ilə örtbasdır etməyəcək. Heç olmasa, özümüzü də düşünməsək, gələcəkdə bizi əvəz edən nəsilləri düşünək. Bu vəzifə beş-on günlük dünyada qalacaq. Bizlər isə, hamı kimi bir bu dünyanı tərk edəcəyik. Damarlarının qanını yüz dəfələrlə də dəyişsən, dərini yüz dəfə təzədən əməliyyat edib özünü cavanlaşdırmaq istəsən, hər gündə on dəfə həkimə müraciət etsən belə, istənilən anda Allah-taala tərəfindən son anın gəlib çataçaq! Onda hər kəsin özünəməxsus vəziyyəti olacaq. İstərdim ki, müqədəs Quranmızda, o son dəqiqələrə olunan bəzi işarələri, bu soyuq qış havasında dindar və özünə mənəvi yolu seçmiş insanların başlarını yaranların, özü ilə Allah-taala arasında hesab kitab aparmayan bəzi zalimlərin diqqətinə çatdırım.

Əvvəldə qeyd edəcəyim ayə, qoluna güvənib kimi gəldi vuran və Allahın hesab-kitabına inanmayanlara aiddir:

1)  "Kaş sən zalımları ölüm əzabı içində çabalayan, mələklərin də (bu zaman) əllərini uzadıb: "Çıxarın canlarınızı! Siz bu gün Allaha qarşı nahaq sözlər danışdığınıza və Onun ayələrinə təkəbbür göstərdiyinizə görə alçaldıcı bir əzabla cəzalandırılacaqsınız!" - dediklərini görəydin!" (Ənam surəsi, 93-ü ayə)

2) Bəziləri belə güman edir ki, bu dünyadan köçməklə işləri rahatlaşır, amma çox səhvə yol verirlər. Onların ağır əzabları elə ölüm anından başlanır. İnanmayanlar ölən anda bu məsələni dəqiq anlayacaqlar. Təssüflər olsun ki, o anda artıq iş-işdən keçmiş olacaq. Ona görə də indidən tövbə edib, zülm etdiyin şəxslərdən üzr istəməlisən!

"(Ya Rəsulum!) Kaş sən haqqı dananlırı mələklər onların üzünə və yanlarına vura-vura: "Dadın atəşin əzabını!" - deyib canlarını alanda görəydin!   Bu (əzab) sizin öz əllərinizlə qazandığınız (əllərinizin törətdiyi) günahlara görədir. Yoxsa Allah bəndələrinə əsla zülm edən deyildir!"  (Ənfal surəsi, 50-51-ci yalər) 

3) Amma, dünyada malı, pulu, vəzifəsi onu aldadanlara Quran belə müraciət edir:

"Xeyr, xeyr! Siz tez keçib gedəni (fani dünyanı) sevirsiniz.

21. Axirəti isə tərk edirsiniz.

22. O gün neçə-neçə üzlər sevinib güləcək,

23. Öz Rəbbinə baxacaqdır!

24. O gün neçə-neçə üzlər tutulub qaralacaq,

25. Bel sümüklərinin (dəhşətli bir əzabla) qırılacağını anlayacaqdır!

26. Xeyr, (can) boğaza gəlib yetişəcəyi,

27. "(Onu bu bəladan) kim xilas edə bilər?" - deyiləcəyi,

28. (Can üstə olan kimsə) ayrılıq dəminin gəlib çatdığını anlayacağı,

29. Və (ölüm qorxusundan) qıçı-qıçına dolaşacağı zaman,

30. Aparılacağı yer Rəbbinin hüzuru olacaqdır (ey insan)! (Qiyamət surəsi, 20-30-cu ayələr)

Sonda, hər bir vətəndaş kimi mən də, ölkənin mərkəzində dindar qardaşlarıma qarşı bəzi məmurların belə vəhşiylini pisləyir və qoluzorlulara özlərini 20 ilə yaxın Vətənimizdə kef sürən və hər gün bizlərdən şəhid alan erməni əsgərlərin qarşısında sınamağı məsləhət bilirəm! Xalqın əmniyyət və təhlükəsizliyinin keşiyində duranlara isə indiyə kimi arasını açıb oxumadığı bir əsas dövlət qanunu onlara xatırladıram:

Maddə 2. Azərbaycan Respublikasının Cinayət Məcəlləsinin vəzifələri 

2.1. Azərbaycan Respublikasının Cinayət Məcəlləsinin vəzifələri sülhü və bəşəriyyətin təhlükəsizliyini təmin etməkdən, insan və vətəndaş hüquq və azadlıqlarını, mülkiyyəti, iqtisadi fəaliyyəti, ictimai qaydanı və ictimai təhlükəsizliyi, ətraf mühiti, Azərbaycan Respublikasının konstitusiya quruluşunu cinayətkar qəsdlərdən qorumaqdan, habelə cinayətlərin qarşısını almaqdan ibarətdir."

Görəsən, bütün dünyanın gözü önünüdə günün günorta çağı, dinc şəkildə, Peyğəmbərimizin (s) vəfatı günü, şəhidlərimizin ziyarətinə əklil aparan dindar ölkə vətəndaşlarını bu şəkildə vəhşicəsinə vurmağı onlara kim icazə verib?! Ölkənin hüquq mühafizəçiləri və məhkəmə orqanları isə dinc ölkə vətəndaşlarının başlarını yaranları tezliklə məsuliyyətə cəlb edib, onları öz cəzalarına çatdırmalıdırlar. Onlara da bu dövlət qanununu xatırlatmaq istərdim:

Maddə 46. Şərəf və ləyaqətin müdafiəsi hüququ

1. Hər kəsin öz şərəf və ləyaqətini müdafiə etmək hüququ vardır.

2. Şəxsiyyətin ləyaqəti dövlət tərəfindən qorunur. Heç bir hal şəxsiyyətin ləyaqətinin alçaldılmasına əsas verə bilməz.

3. Heç kəsə işgəncə və əzab verilə bilməz. Heç kəs insan ləyaqətini alçaldan rəftara və ya cəzaya məruz qala bilməz. Özünün könüllü razılığı olmadan heç kəsin üzərində tibbi, elmi və başqa təcrübələr aparıla bilməz."

Cinayət məcəlləsi isə onlara bu əsası verir:

Maddə 309. Vəzifə səlahiyyətlərini aşma

309.1. Vəzifəli şəxs tərəfindən xidməti səlahiyyətlərinin hüdudlarından açıq-aşkar surətdə kənara çıxan hərəkətlər etməsi fiziki və ya hüquqi şəxslərin hüquqlarına və qanuni mənafelərinə, yaxud cəmiyyət və ya dövlətin qanunla qorunan mənafelərinə mühüm zərər vurduqda -

min manatdan iki min manatadək miqdarda cərimə və ya iki ilədək müddətə islah işləri və ya üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə, əmlakı müsadirə olunmaqla üç ilədək müddətə azadlıqdan məhrum etmə ilə cəzalandırılır.

309.2. Bu Məcəllənin 309.1-ci maddəsində nəzərdə tutulmuş əməllər zor tətbiq etməklə və ya zor tətbiq etmə hədəsi ilə törədildikdə, yaxud silah və digər xüsusi vasitələrdən istifadə etməklə törədildikdə və ya ağır nəticələrə səbəb olduqda -

üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə, əmlakı müsadirə olunmaqla üç ildən yeddi ilədək müddətə azadlıqdan məhrum etmə ilə cəzalandırılır.

Nəhayətdə, zalimlər bilsinlər ki dindarların Allahı var, onlar öz Allahlarına güvənirlər. Və Allaha güvənən müsəlman isə həmişə qalibdir! Zalimləri isə aqibəti budur:

"O gün günahkarları qandallanmış (zəncirlə bir-birinə bağlanmış) görəcəksən! Köynəkləri qətrandan olacaq, üz-gözlərini də atəş bürüyəcəkdir! Allah hər kəsə (dünyada) etdiyi əməllərin cəzasını vermək üçün belə edəcəkdir! Şübhəsiz ki, Allah tezliklə haqq-hesab çəkəndir!  Bu (Quran) insanlar üçün elə bir moizədir ki, onunla həm qorxsunlar, həm də Allahın tək bir tanrı olduğunu bilsinlər, həm də ağıl sahibləri düşünüb ibrət alsınlar!" (İbrahim surəsi, 49-51)