Qərb insanı mənəvi cəhətdən nə qədər geriləsə də mövcud qanunlar daim yenilənməkdədir. Düzdür, bu qanunlar bəzən həddini aşır və dini dəyərlərin təhqirinə yol açır (əslində bu da mənəvi geriləməyin baş bir təzahürüdür). Ancaq çox hallarda insan haqları qanunların əsas prinsipi olaraq qalır. Bu cəhətdən hələ bizlərin onlardan öyrənəsi çox məsələlərimiz var. Təbii ki, İslam bütün bunlara 14 əsr əvvəl cavab verib və nizama salıb, ancaq dünyəvi yolla gedən ölkəmiz və bu ölkənin idarəçiləri gərək hərdən Qərbin bu yaxşı cəhətlərinə fikr versinlər.

Xəbəriniz olmamış olmaz, artıq qərb ölkələrində başıörtülü qızların təhsil alması üçün şərait yaradılmaqdadır. Elə faktxəbərin yazdığı kimi "Başörtüyü qadağası" kimi faşist ruhlu qadağaların olmadığı İngiltərədə daha bir müsəlman qızlar məktəbi istifadəyə verilib. Kembricşayr bölgəsində ilk qızlar məktəbi olan Peterburqdakı İqra akademiyası qız uşaqlarını orta məktəblərə göndərmək istəməyən müsəlmanlar üçün nəzərdə tutulub. Müsəlman qızlar məktəbində digər məktəblərdə tədris olunan fənnlərlə yanaşı, İslam dini dərsi də keçiləcək. Qızlar məktəbində müsəlman şagirdlərlə yanaşı, digər dinlərdən olan qızlar da təhsil ala biləcəklər. Məktəbin açılmasında öz köməkliyini əsirgəməyən Peterburq bələdiyyəsinin nümayəndələri bunun müsəlman uşaqların təhsilinə verilən əhəmiyyətdən irəli gəldiyini bildiriblər. Qeyd edək ki, Peterburq Müsəlmanları Təhsil Dərnəyi tərəfindən açılan məktəbdə hal-hazırda 23 şagird təhsil alır. Bax, bu Qərbin özəllik və gözəlliklərindən biridir. Təbii ki, bizim məmləkət qərbyönümlü inkişaf və tərəqqi yolunda irəliləməyə çalışırsa, gərək ki bu məsələləri də nəzərə alsın. Ancaq, çox təəssüflər ki, bizim icra hakmiyyəti orqanları (belə deyək də bizdə bələdiyyələr hələ nəzərə çarpacaq dərəcədə gözə dəymədiyindən icra orqanları əsas götürülür) məktəb direktorlarına xüsusi göstərişlər verməklə hicablı şagirdləri məktəbə və ya universitetlərə buraxmamaq haqqında göstərişlər verirlər. Buna nə ad verək "Qərb yönümlü Azərbaycanvari siyasət" yoxsa?! Hər halda mən buna bir ad tapıb qoya bilmirəm. Bəlkə siz biləsiz?!

Hə, bu gün əldə etdiyim xəbər isə məni yaxşı mənada qərbin müsəlman qadınına verdiyi dəyərə həsəd aparmağıma səbəb oldu (təbii ki, ölkə məmurları ilə müqayisədə). Beləki, müsəlman qadın boksçular Londondakı 2012-ci il Olimpiadasında hicabla çıxış edəcəklər. Hazırda 25 qadın idmançı Kabil stadionunda məşq edir. Onların məşqçisinin sözlərinə görə, yarışlara ənənəvi İslam geyimində çıxmaq niyyətindədirlər.Beynəlxalq Boks Federasiyasının nümayəndəsi isə bildirib ki, qadın boksçulara rinqə İslam geyimində çıxmağa heç nə mane olmur: "Sözsüz ki, dini tələblər nəzərə alınmalıdır. Ona görə də biz bu məsələdə mümkün qədər tolerant olmaq istəyirik".

Zərif cinsin nümayəndələri ağır idman növündə və üstəlik də öz dini zinətləri ilə birgə. Bu artıq qələbədir. Bunun üçün maddi cəhətdən zənglinlik tələb olunmur. Sadəcə, qanun və qaydanın mövcudluğu və ona əməl olunması lazımdır. Lap elə konstitusiyamızın biz hicablı xanımlara verdiyi hüquqlar kimi. Əgər Ana Yasamıza əməl olunsaydı, bu ölkədə heç bir inanclı xanımın hüquq və haqları tapdalanmazdı.