Xəbər Lenti

Sorğu

İnfografika

Arxiv

Yazar

09 Dekabr

2016
10:48
1189
Turizmdə Azərbaycanla Gürcüstanın fərqi - Ekspert danışır

Milli Məclisin dekabrın 7-də keçirilən iclasında deputat Elşən Musayevlə spiker Oqtay Əsədov arasında polemika yaşanıb. Deputat ölkəmizdə turizmin inkişaf etmədiyini qeyd edərək, bu gedişlə Azərbaycanın bu sahədə qonşu Gürcüstandan qat-qat geri qalacağını bildirib.

Onun fikirləri parlament sədrinin sərt reaksiya ilə qarşılaşıb. O.Əsədov Gürcüstanın Azərbaycanın əyaləti boyda olduğunu bildirərək, turizm sahəsində ölkəmizin qonşu dövlətdən geriyə qalmasının mümkünsüzlüyünü vurğulayıb.

Əslən Gürcüstandan olan iqtisadçı ekspert Natiq Cəfərli bildirdi ki, oktyabr ayında verilən məlumata görə, Gürcüstana 5.5 milyon turist səfər edib. Azərbaycanlılar turistlərin sırasında ilk pillədə qərarlaşıb. Təxminən 600 mindən çox azərbaycanlı turist qonşu ölkəyə səfər etmişdi ki, bu da turistlərin 12-13%-i təşkil edir. İlkin hesablamalara görə, təxminən turistlər 3 milyarda yaxın xərcləmələr ediblər. Bu da təbii ki, böyük rəqəmdir. Gürcüstan  kimi iqtisadiyyatı kiçik bir ölkə üçün bu rəqəm ciddidir. 

Turizmin inkişafı kafe, restoranların inkişafını, alış-veriş mərkəzlərində ticarət dövriyyəsinin artmasını, taksi xidmətinin inkişafını və gəlirlərinin artmasını təmin edir. Bir çox sahələr var ki, turizm inkişaf etdikcə bu sahələri də arxasınca aparır. Gürcüstan əslində burada velosiped kəşf etməyib, dünyanın inkişaf yoluna nəzər salıb. 108 ölkə ilə vizaları ləğv edib. Çox ucuz uçuşlar təşkil olunub. Gürcüstan bazarında 12 şirkət rəqabətli şəkildə fəaliyyət göstərir. Sərnişin daşımalarını burada nəzərdə tuturam. 108 ölkə ilə vizaların ləğvi ilə ucuz uçuşların təşkil olunması və digər amillər Gürcüstanı cəlbedici turizm mərkəzinə çevirib. 

Rəsmi rəqəmlərə görə Azərbaycandan xeyli dərəcədə qabaqdadır. Burada deputatın dediyində böyük həqiqətlər var. Turizm sahəsində Gürcüstanı Cənubi Qafqazın lideri saymaq olar. Amma ümumdaxili məhsulun həcminə və büdcəyə görə Azərbaycan irəlilədir. Bu da təbii neft faktoru ilə bağlıdır. Gürcüstanda digər sahələrdə də artım müşahidə olunur. İxracatının bu il ilk 10 ayında ötən ilə nisbətən ciddi artım müşahidə olunur. 12-14%-lik artım var. Bu da Gürcüstanın əlavə valyuta qazanmasına imkan yaradır".

İqtisadçı ekspert Azərbaycanın turizm sahəsində Gürcüstandan geri qalmaması üçün həyata keçirməli olduğu yollardan da söz açdı: “Turizmlə bağlı Azərbaycanın potensialı var ki, Gürcüstanı qabaqlasın. Həm coğrafi mövqeyinə, həm də ölkənin infrastrukturuna görə bu şansları var. Sadəcə, bu şanslardan istifadə etməyi bacarmaq lazımdır. Bunun üçün ilk növbədə, viza problemləri aradan qaldırılmalıdır. Azərbaycan uzun illərdir bununla bağlı müəyyən addımlar atmaq istəyir. Amma bu istiqamətdə ciddi bir irəliləyiş yoxdur. Bir faktı deyim ki, Türkiyədən Gürcüstana nəinki xarici pasportla, hətta sürücülük vəsiqəsi ilə belə keçmək mümkündür. Amma bizdə bir çox ölkələrə, o cümlədən, Türkiyəyə hələ də viza tətbiq olunur. Onlarla ölkə ilə vizanı aradan qaldırmaq lazımdır. Vizalar sadələşdirilməlidir ki, turist üçün ciddi problemlər yaranmasın. 

Bizdə ən böyük problemlərindən biri də miqrasiya xidmətində qeydiyyatla bağlıdır. Gürcüstanda bir ildən artıq qalan xarici vətəndaşlar qeydiyyata düşməlidirlərsə, biz də bu 10 gündür. Bu da ciddi problemlər və maneələr yaradır. Aviaşirkətlər məsələsində də problemlər var. Azərbaycan öz qapılarını aviaşirkətlərə açmalıdır. Ucuz sərnişin daşıyan şirkətlər Azərbaycana gəlməlidir. Bu sahələrdə, viza və qeydiyyat məsələsində irəliləyiş olsa, təbii Azərbaycan turizm sahəsində Gürcüstanla rəqabət apara biləcək. Əks halda bu sahələrdə əngəllər qalmaqda davam edəcəksə, nəticə əldə olunmayacaq, Gürcüstan turizm sahəsində daha da irəliyə gedəcək, gəlirlərini artıracaq”.

Məqalədə : Bakı və Tiflis Tbilisi 
Bölmənin digər xəbərləri


® 2009 FAKTXEBER.COM - Azərbaycan Onlayn Xəbər Portalı

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


15-12-2017 10:13

ƏLAQƏLƏR

  (+994 70) 870-47-49      (+994 55) 786-96-84

  [email protected]


Valyuta.com


Рейтинг@Mail.ru