“Mənim evim - mənim qalam” ifadəsi boşuna deyilməyib. Evimiz və ya mənzilimiz həmişə qayıtmaq istədiyimiz, yer üzündəki ən təhlükəsiz və rahat guşədir. Evi ev edən isə onun içərisindəki əşyalar, ən əsası isə mebeldir.  

Bu gün paytaxtda kifayət qədər mebel salonları var ki, burada istənilən zövqə uyğun mebellər tapmaq mümkündür. Ancaq qiymətlərə gəlincə, zövqünüzə uyğun mebeli almaqda və evimizi istədiyimiz kimi düzənləməkdə bir qədər tərəddüd etməli oluruq. Çünki qiymətlər “ceyran belindədir” desək, yanılmarıq. 

Məhərrəmlik ayı çıxdığından artıq toylar başlayıb. Məhz bundan istifadə edən bir sıra işbazlar isə qiymətləri bahalaşdırıblar. Azərbaycanda yerli istehsal mebellərlə yanaşı İtaliya, Rumıniya, Türkiyə, Yunanıstan kimi ölkələrin mebellərini də tapmaq mümkündür. Təbii ki, qiymət də, mebelin hara istehsalı olmasından asılı olaraq, dəyişir. Bir neçə mebel salonuna baş çəkib qiymətlərlə maraqlandıqda doğrudan da təəccüblənməmək mümkün deyildi. 

İlk baş çəkdiyimiz məkan “Yağmur” mebel salonu oldu. Burada Türkiyə və İtaliya mebellərinin olduğunu deyən satıcılar qiymətlərin 8 min manatdan başladığını deyirdi. İtaliya mebelləri isə 18 min manatdan başlayır. Belə ki, burada ən ucuz mebel Türkiyə istehsalı olan “Artella” yataq dəstidir ki, onun qiyməti endirimlə 4300 manatdır. “Escuda” yataq dəstinin qiyməti isə 10 min manatdan 9800 manata endirilib. Satılan qonaq dəstləri, yumşaq mebellərin isə hər bir hissəsi ayrı-ayrılıqda satılırdı. Mətbəx üçün nəzərdə tutulmuş stulların 1 ədədi 80-200 manat arasında dəyişirdi. Özəlliyi isə Azərbaycan yox, Türkiyə istehsalı olmasıdır.

Daha sonra Azərbaycanda məşhur olan “İstikbal”a baş çəkdik. Azərbaycanda bir neçə satış nöqtəsi olan “İstikbal”ın məhsulları paytaxtda öz qiymətindən dəfələrlə baha satılır.

“İstikbal”ın Türkiyə saytına girib mebel qiymətlərini müqayisə etdikdə aradakı fərqin nə qədər böyük olduğunu görmək olur. Burada qonaq otağı dəstləri formasına görə 5000, 5060, 6825 manata satılırdı. “İstikbal” mebel salonunun satıcısı qiymətlərin baha olmasının məhsulların Türkiyədən gətirilməsi ilə əlaqəli olduğunu dedi. Satıcının sözlərinə görə, qiymət artımı daha çox məzənnə ilə bağlıdır. Mebellər oradan dollarla alındığı üçün fərqlənir. Mebel salonunda olan alıcı Rəna Əliyeva “İstikbal”dan qonaq otağı dəsti almağa gəlsə də, fikrindən daşındığını dedi: “Mənim bəyəndiyim qonaq otağı dəstləri bahadır. Düşünmüşdüm ki, 4-5 minə  ürəyimcə olan bir dəst tapa bilərəm. Yəqin ki, digər mebel salonlarına baxacam”.

Bu mebel salonlarında alıcılar da olduqca azdır. Hətta mebel salonunda alıcı görəndə satıcılar sevinir. Hətta bir sıra mebellər var ki, endirimlə satılır. Məsələn, xarici istehsal olan 16 min 500 manata satılan qonaq dəsti 14 minə, yumşaq mebel dəsti 10 min 200 manatdan 8 min 875 manata, yataq dəsti isə 9 min manatdan 6200 manata düşüb.  Ancaq müxtəlif endirim kampaniyalarına baxmayaraq, yenə də xarici istehsal olan mebellərə olan maraq böyük deyil. Daha çox yerli mebellər alınır ki, bunun da səbəbi onların qiymətinin xarici istehsal olan mebellərdən dəfələrlə ucuz olmasıdır. 

Yerli mebellərin qiyməti ilə də yaxından tanış olmaq üçün  yolumuzu “Madeyra” mebel salonundan saldıq. Burada qiymətlər 900 manatdan başlayırdı. Təbii ki, məsələn, 1200 manata bir yataq otağı dəsti alırsansa, yatağın döşəyi ayrıca satılır və qiymətləri 200 manatdan başlayır. Burada 1100 manata yataq dəsti, kornella künc divanının kiçik yazı stolu isə ayrıca 250-300 manata satılırdı. 

Bu isə o deməkdir ki, bir divanı almaq əslində sizə 1200 yox, 1500 manata başa gələcək. Təbii ki, əgər siz bütün bunları kreditlə almaq istəsəniz, o zaman bu rəqəm iki dəfəyədək artır desək yanılmarıq. Yerli istehsal sayılan “Embawood” mebel salonunda isə qiymətlər “Madeyra”dan bir qədər baha idi. Burada da mebellər yerli istehsal idi. 

Müxtəlif mebel salonlarında apardığımız araşdırma zamanı məlum oldu ki, hazırkı qiymətlərlə bir evi normal mebel dəsti ilə təchiz etmək üçün yerli istehsal mebel alırsansa, təxminən 10 min manat , xarici mebellərlə təchiz etmək istəyirsənsə, 20-30 min manat arasında pul lazımdır.

Xarici ölkələrə nəzər salsaq bu ölkələrdə mebellərin qiymətlərinin və tələbatın Azərbaycandakından az olduğunu görərik. Ümumiyyətlə, dünya ağac ehtiyatlarının 25 faizdən çoxu Rusiya ərazisində yerləşdiyinə baxmayaraq, mebel sənayesinin zəif inkişaf etməsi nəticəsində Rusiya dünya mebel bazarının cəmi 2 faizini istehsal edir. Eyni zamanda ərazisinin yalnız 14 faizi meşə örtüyü olan və mebel sənayesi üçün ilkin xammalın 97 faizini idxal edən Çin dünya mebel bazarının 9,4 faizini təmin edir. Əhalisi cəmi 2 milyon olan, mebel üçün xammalın 94 faizini idxal edən Sloveniya isə ildə 600 milyon dollar məbləğində mebel ixrac edir.

Ümumiyyətlə, mebel seçimində onun hansı üsluba aid olması da evinizə gələn qonaqlar üçün sizin barənizdə çox söz demiş olur. Mütəxəssislər bildirirlər ki, şərq üslubu daha çox şan-şöhrət, zənginliyi təcəssüm etdirir, Avropa stili isə ucuz və rahatlığı ilə seçilir. (musavat.com)