Artıq bir neçə aya yaxındır ki, saytımızın sual-cavab bölməsinə oxucularımız müxtəlif sahələri əhatə edən suallar ünvanlayırlar. Sualların növündən və əhatə etdiyi sahəsindən asılı olaraq ekspertlərdən və rəsmi qurumlardan münasibət öyrənərək izləyicilərimizin suallarına cavab veririk. Budəfəki oxucumuzun ünvanladığı sual sosial yardımın alınması ilə bağlıdır. Sualda qeyd olunur ki, biz ailədən 3 nəfərik. Həyat yoldaşım, mən və oğlum. Həyat yoldaşım heç yerdə işləmiR. Özümdə evdar xanımam. Belə bir vəziyyətdə mənim sosial yardım almağım mümkündürmü? Oxucumuzun sualı ilə bağlı Əmək və Əhalinin Sosial Müdafiə Nazirliyi ilə əlaqə saxladıq. Nazirlikdən bildirdilər ki, adam başına aylıq gəliri 84  manatdan az olan ailələrə sosial yardım verilir. "Sosial yardımın alınması üçün gərək ailə başçısı haradasa işləsin. Əks halda hər hansı bir işi olmayan vətəndaşlara sosial yardım ayrılmır. İşi olmayan şəxslər Məşğulluq İdarəsinə yazılaraq, adı çəkilən idarədən xüsusi bir sənəd gətirməlidirlər. Bundan sonra vətəndaşlara sosial yardımın verilməsi ilə bağlı proseslər həyata keçirilir",- deyə idarədən bildirdilər.

Xəyal Şükür