FaktXəbər-in verdiyi məlumata görə, Norveçin şimalında 8 min NATO əsgəri Rusiya ilə sərhəddə yerləşən Finnmark bölgəsində təlimlərə başlayıb. Norveç Silahlı Qüvvələri açıqlayıb ki, ABŞ, İngiltərə və Norveç əsgərlərinin iştirak etdiyi "Joint Viking 2017" təlimi ölkənin müdafiə olunmaq praktikasını artırmaq məqsədi daşıyır.

Ölkənin dövlət radiosu olan "NRK"-yə müsahibə verən hərbi sözçü İvar Moen bildirib ki, təlim zamanı döyüş təyyarələri, vertolyotlar və yük təyyarələri də iştirak edir. Norveç rəsmisi əlavə edib ki, təhlükəsizliyi təmin etmək məqsədiylə təlimin keçirildiyi bölgədə pilotsuz təyyarələrin uçuşu qadağan olunub.
 
Rusiya ilə 160-300 kilometr sərhəddə keçirilən və 15 marta qədər davam edəcək təlimdə ABŞ Quru Qoşunları, ABŞ Donanması və İngiltərə Kral Donanmasının 700 əsgəri iştirak edir.