Sorğu

Kürdüstan referendumundan nə gözlənilir?

İraqın bölünməsi
Vətəndaş müharibəsi
Nəticəsiz qalacaq
Referendum keçirilməyəcək

Xəbər Lenti

İnfografika

Arxiv

27 Oktyabr

2016
09:50
888
Ölkənin iqtisadi reputasiyası aşağıdır - İqtisadçı ekspert

Azərbaycan hökuməti ölkəyə valyuta axınını təmin etmək üçün xarici iş adamlarını ölkəmizə investisiya qoymağa dəvət edir. Prezident İlham Əliyev də çıxışlarında həm xaricdəki azərbaycanlı iş adamlarını, həm də xarici investorları ölkəmizə yatırım etməyə səsləyir. Son olaraq, Xorvatiya prezidentinin Azərbaycana rəsmi  səfəri zamanı dövlət başçısı bu məsələyə toxunub və xorvat iş adamlarını Azərbaycana sərmayə yatırmağa çağırıb. 

Prezident Oktyabrın 25-də Bakıda keçirilən Azərbaycan-Xorvatiya biznes forumunda çıxışında Xorvatiya prezidentinin Azərbaycana səfərinin müsbət nəticələri olduğuna diqqət çəkib: “Müzakirələrdə iqtisadi əməkdaşlığa xüsusi diqqət yetirilib. Çox məmnunuq ki, bir qrup xorvat iş adamı Xorvatiya prezidentini müşayiət edir və bu gün bu biznes foruma qatılıb. Səfər çox uğurlu olub. Biz strateji tərəfdaşlığımızı bir daha vurğuladıq, əməkdaşlığımızın əsas istiqamətlərini müəyyən etdik. 

Biz dost, tərəfdaşıq. İş adamları bu gözəl imkanlardan istifadə edərək əlaqələri genişləndirməlidir. Çünki sərmayə qoyuluşu, birgə fəaliyyət böyük əhəmiyyət kəsb edir. Bizim keçmişdə də birgə layihələrimiz olub. Artıq vaxt gəlib ki, idxal-ixrac əməliyyatlarımızı genişləndirək”. 

Prezident İlham Əliyev onu da bildirib ki, oktyabrın 24-də müxtəlif formatlarda görüşlər keçirilib və burada da əsas məsələ qarşılıqlı iqtisadi əməkdaşlıq olub: “Azərbaycanın iqlim şəraitindən istifadə və Xorvatiyadan müəyyən məhsulların idxal olunması təklifləri var. Əminəm ki, bu gün burada daha geniş müzakirələr aparılacaq. Burada qarşılıqlı faydalı əməkdaşlıqdan söhbət gedir. Biz Xorvatiyanın ixracından xəbərdarıq. Siz də bilirsiniz ki, Azərbaycan hansı məhsulları ixrac edir. Bu forumda bu istiqamətlərə diqqət yetirilməlidir”. 

Dövlət başçısı qeyd edib ki, ölkəmizdə yeni sənaye sahələrinin yaradılmasında maraqlıyıq: “Burada əczaçılıqdan söhbət gedir. Xorvatiyanın bu sahədə böyük təcrübəsi var. Bu baxımdan, idxaldan asılı ölkəyik. Düşünürəm ki, dərman istehsalı sahəsində birgə müəssisələrin yaradılması bizim üçün faydalı olar. Çünki əhalimizin sayı artıq 10 milyon nəfərə çatır”.

İqtisadçı ekspertlər hökumətin ölkəyə xarici investisiya cəlb etmək üçün atdığı addımları təqdir etsələr də, ölkədə investisiya mühitinin çatışmazlıqlarını da vurğulayıblar. Məhz bu amil xarici sərmayədarların ölkəyə yatırım etməsinə mane olur. 

Məsələ ilə bağlı “Yeni Müsavat”a danışan iqtisadçı ekspert Rəşad Həsənov bildirdi ki, çox acınacaqlı vəziyyətin müşahidə olunduğu sahələrdən biri də investisiya mühitidir: “Demək olar ki, ötən dövr ərzində qeyri-neft sektoruna investisiya qoyuluşu məhdud olub, xüsusən də xarici investorların marağı az olub. Xarici investisiya adı ilə ölkəyə daxil olan vəsaitlərin də böyük bir hissəsi Azərbaycanın vəsaitləridir. O vəsaitlər ki, onlar sonradan hansısa offşor şirkətlər vasitəsilə xarici investisiya adı altında ölkəyə daxil ediliblər. 

Bu istiqamətdə görüləcək iş əslində ölkə reputasiyasının yenidən bərpa edilməsi məsələsidir. Çünki bu istiqamətdə ölkənin reputasiyası həqiqətən kifayət qədər aşağıdır. Bu zərurətdən ölkə başçısı bütün görüşlərində xarici investorları Azərbaycana gəlməyə dəvət edir və hətta dövlət zəmanəti ilə onları ölkəyə çağırır. Dövlət qurumları bu günə qədər qeyri-neft sektorunda ən müxtəlif formada  sahibkarların, xarici investorların fəaliyyətinə müdaxilə ediblər. Neft sektoruna gücləri çatmır, çünki orada oyun qaydaları fərqlidir".  

Ekspert onu da vurğuladı ki, indiki dövrdə xarici investorların Azərbaycanla bağlı çox mənfi təcrübələri var: “Ölkənin beynəlxalq hesabatlarda imici ilə bağlı çox ciddi problemlər var. Həmin problemlərdən biri də odur ki,  Azərbaycanda məhkəmə sistemi sahibkarın hüquqlarını qoruya biləcək səviyyədə deyil. Hazırda fərqli model və ya mexanizmin düşünülməsinə ehtiyac var. Xarici investisiyanın ölkəyə gətirilməsi üçün azad məhkəmə və azad investisiya mühiti olmalıdır. Həmçinin korrupsiya ilə mübarizə aparılmalıdır. Azərbaycanın korrupsiya ilə apardığı mübarizənin nəticələri ölkənin beynəlxalq imicinin yüksəlməsinə təsir edə bilməyib”. 

Rəşad Həsənovun sözlərinə görə, bu sahədə ən böyük problemlərdən biri də biznesə məmur müdaxiləsi və məmur biznesidir: “Ölkə iqtisadiyyatı kifayət qədər inhisarlaşıb. İstənilən biznesmen hansısa məmurun maraqlarına  toxunduqda onun kimliyindən asılı olmayaraq, həmin investor ən qısa müddətdə ölkədən çıxarıla bilər və ən ədalətsiz şəkildə təzyiqlərə məruz qala bilər. 

Xarici investorun ölkəyə gəlməsi hazırkı durumda qeyri-mümkün məsələ hesab olunur. Qeyd olunan istiqamətlərdə ciddi nailiyyət əldə olunmayana qədər bəhs etdiyimiz məsələlər bu səviyyədə qalacaq. Biz ilk növbədə öz vətəndaşımızı inandıra bilməliyik ki, Azərbaycana investisiya qoysun. 

Əgər bu gün öz biznesmenimiz Azərbaycana investisiya qoymaqdan çəkinirsə, biz hansı haqla bunu xarici investorlardan tələb edə bilərik. Əsas məsələ ölkənin reputasiyasını yüksəltmək və qeyd olunan problemləri həll etməkdir. Bu problemləri müvəqqəti həll edərək xarici investisiyanı cəlb etmək, sonradan vəziyyət düzələndə yenidən əks hücuma keçmək kimi hərəkətlər sektor iştirakçılarında birmənalı şəkildə inamsızlıq yaradır. Azərbaycanla bağlı da buna bənzər situasiya mövcuddur. Bu mənada hökumət aparılan islahatlarda səmimi olduğunu sübut edə bilməlidir. Əks halda, bu kimi cəhdlər ciddi nəticə verməyəcək".

Bölmənin digər xəbərləri


® 2009 FAKTXEBER.COM - Azərbaycan Onlayn Xəbər Portalı

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


ƏLAQƏLƏR

  (+994 70) 870-47-49      (+994 55) 786-96-84

  [email protected]


Valyuta.com


Рейтинг@Mail.ru