Xəbər Lenti

Sorğu

İnfografika

Arxiv

15 Mart

2017
10:05
527
Daha bir ünvanda yaşıllıq məhv edilir, yerində isə...

“İcra hakimiyyətinə müraciət etmişdik ki, bizə imkan versin, binanın qarşısındakı yaşıllıqda bir az təmizlik işi aparıb skamyalar qoyaq, istirahət məkanı yaradaq. Yaxınlığına da dayanacaq qoysunlar. Cavab gəlmədi. Martın 9-dansa elə həmin yaşıllığı məhv edirlər”.

Xətai rayonu, Xudu Məmmədov küçəsindəki 25 saylı binanın sakinləri AzadlıqRadiosu-na yazdıqları məktubda ərazidəki ağacların kəsilməsindən narahatlıqlarını bildirirlər. Onların sözlərinə görə, martın 13-də əraziyə gələn icra hakimiyyətinin fəhlələri ağaclara “toy tutub”.

“MƏHVƏ SÜRÜNÜRÜK”

27-ci binada yaşayan Toğrul Səmədovun “Qaynar xətt”ə deməsinə görə, sakinlərin qulağına çatıb ki, kəsilən ağacların yerində bina tikiləcək:

“Bir müddət əvvəl ərazidə uşaq meydançası ləğv olunaraq yerində hündürmərtəbəli bina tikildi. Şikayət elədik, özümüz dedik, özümüz eşitdik. Bildiklərini elədilər. İndi də olan-qalan yaşıllığı məhv etməyə qalxıblar. Onsuz da buralarda yaşıllıqdan iz də qalmayıb. Bir ucdan ağacları qıra-qıra, bina tikə-tikə gedirlər. Məsələn, gətirib üç 9 mərtəbəli binanın arasına zorla dördüncünü – 16 mərtəbəlini yerləşdirirlər. Sahibkarların arxasında məmurlar dayanır. Belə olmasa, sahibkar sakinə ‘icra da mənəm, prezident də mənəm, bələdiyyə də mənəm’ deməz. Uçuruma gedirik, 5 mərtəbəliyə bitişik 18 mərtəbəli tikməyin axırı fəlakətdir. Kiminsə görməmişliyi üzündən məhvə sürünürük. Bir gün bu binaların altında qalacağıq”.

Sakinlər bildirirlər ki, əsasən, çoxillik küknar və şam ağacları kəsilib. Qarşısını ala bilməyiblər. Orxan Cəlilov:

“Polis də burdaydı, icra hakimiyyətinin işçisi də… Gözlərinin qabağında kəsildi. Hardasa 20-yə yaxın ağac kəsdilər”.

“ELƏCƏ BAXDILAR, DEDİLƏR, ARAŞDIRACAĞIQ”

Sakinlərin davamlı müraciətlərindən sonra əraziyə Ekologiya və Təbii Sərvətlər Nazirliyinin nümayəndələri gələrək baxış keçiriblər. Orxan Cəlilov:

“Düzdür, gəlirlər, ancaq çox gec gəlirlər. Elə bil, gözləyirlər ki, iş bitsin, sonra gəlsinlər. Sonradan gəlməklərinin nə faydası var ki, o qədər ağac məhv edildi. Eləcə gəlib baxdılar, dedilər, araşdıracağıq, tədbir görəcəyik”.

Xətai rayon icra hakimiyyətindən “Qaynar xətt”in müxbirinin suallarını iki gün ərzində cavablandıran olmayıb. Ekologiya və Təbii Sərvətlər Nazirliyindən isə bildirilib ki, sakinlərin şikayətləri əsasında məsələni araşdırır: “Dünən məlumat gələn kimi müfəttişlərimiz həmin ünvanda olublar. Müəyyən edilib ki, 5 ədəd şam, 4 ədəd qarağac, 1 ədəd zeytun ağacı kəsilib”.

Nazirlik faktın araşdırılması üçün aidiyyəti orqanlara müraciət edib.

Система Orphus Mətndə orfoqrafik səhv aşkar etdinizsə, həmin hissəni qeyd edib Ctrl + Enter düymələrini sıxın.
Xəbərlərimizi Faktxeber.com-un facebook səhifəsində də izləyə bilərsiniz.
Bölmənin digər xəbərləri


® 2009 FAKTXEBER.COM - Azərbaycan Onlayn Xəbər Portalı

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


ƏLAQƏLƏR

  (+994 70) 870-47-49      (+994 55) 786-96-84

  [email protected]


Valyuta.com


Рейтинг@Mail.ru