Xəbər Lenti

Sorğu

İnfografika

Arxiv

06 Yanvar

2017
16:36
3195
Başıbəlalı “Qarabağ tarixi” kitabı və ya onu yazanlar kimin işçiləridir?

Yola saldığımız ildə Milli Məclisin son iclası bir sıra məsələlərin müzakirəsi və iradlarla yekunlaşdı. Üzərində durulan və bayram günləri daxil olmaqla hələ də ictimai müzakirəsi gedən məsələ orta məktəblərdə tədris olunan “Qarabağ tarixi” dərsliyidir.

Parlamentin İctimai birliklər və dini qurumlar komitəsinin sədri, hakim Yeni Azərbaycan Partiyası (YAP) icra katibinin müavini Siyavuş Novruzov bir qrup tarixçi müəllimin ona müraciət edərək, 8-ci sinifdə rus dili bölməsində Azərbaycan və Qarabağın tarixinin ayrıca kitablarla tədris olunmasından şikayətləndiklərini bildirmişdi. 

O qeyd edib ki, bu məsələ diqqətdə saxlanılmalıdır: “Tarixi ayrıca tədris etmək nə deməkdir? Azərbaycana məxsus yerlərin ayrıca tədris olunmasına nə ehtiyac var ki?!”

Milli Məclisin sədri Oqtay Əsədov da bu məsələnin araşdırılıb, aydınlıq gətirilməsini istəmişdi.

Müzakirələrin kulminasiya nöqtəsini isə Əmək və sosial siyasət komitəsinin üzvü, Azərbaycan Milli Elmlər Akademiyasının Tarix İnstitutunun direktoru Yaqub Mahmudov qoymuşdu. O, bunu təxribat adlandırmışdı: “Çox təəssüf ki, bizim ölkədə bir çox dairələr onlara aid oldu-olmadı, yerli-yersiz bu tarix məsələlərinə girişirlər. Beləliklə bizim mənəvi sistemimizə, ideologiyamıza zərbə vururlar. Bir tarix var, o da Azərbaycan tarixidir. Buna kəskin etiraz edirik, bu təxribatın qarşısı alınmalıdır”.

İlk öncə ondan başlayaq ki, kitab təkcə rus bölməsində deyil, Azərbaycan bölməsində də tədris olunur və özü də 2015-ci ildən. Kitab Azərbaycan Respublikası Təhsil Nazirliyinin 19.02.2014-cü il tarixli, 206 nömrəli əmri ilə təsdiq olunub.

“Qarabağ tarixi” tədris vəsaiti Azərbaycanın Qarabağ regionunun ən qədimdən dövrümüzədək tarixini əhatə edir. Kitabda Qarabağ regionunun tarixi xronoloji ardıcıllıqla mərhələlər üzrə ayrı-ayrı mövzular şəklində verilib. Burada Qarabağın yerləşdiyi tarixi ərazi, təbii-coğrafi xüsusiyyətləri, adının etimologiyası, ictimai - tarixi, əhalisinin etnik tərkibi, dövlətçilik ənənələrində, siyasi, iqtisadi və mədəni proseslərdə yeri xüsusi olaraq işıqlandırılıb.

Maraqlıdır, üstündən 2 il keçəndən sonra niyə indi yada düşdü bu kitab? Cavabını bilmədiyim və Siyavuş müəllimdən də soruşmaq imkanım olmadığı üçün birbaşa keçirəm mövzu barədə öz fikirlərimə.

Əvvəla ondan başlayım ki, hörmətli Yaqub müəllimin söylədiyi fikirlərdən son dərəcə dəhşətə gəldim. “Təkrar biliyin anasıdır” məsəlini yada salıb, Yaqub müəllimin sözlərini bir daha qeyd edirəm: “Çox təəssüf ki, bizim ölkədə bir çox dairələr onlara aid oldu-olmadı, yerli-yersiz bu tarix məsələlərinə girişirlər. Beləliklə bizim mənəvi sistemimizə, ideologiyamıza zərbə vururlar. Bir tarix var, o da Azərbaycan tarixidir. Buna kəskin etiraz edirik, bu təxribatın qarşısı alınmalıdır”.

Yenə maraqlıdır, “bir çox dairələr onlara aid oldu-olmadı, yerli-yersiz bu tarix məsələlərinə girişirlər”, - deyəndə, hansı dövlət qurumu nəzərdə tutulur, Təhsil Nazirliyimi? Mən biləni elə bu, Təhsil Nazirliyinin sahəsidir! Bəlkə səhv edirəm, insanları tarixi barədə bilgiləndirmək Təhsil Nazirliyinin vəzifəsi deyilmi? 

Bəlkə təhsil naziri Mikayıl Cabbarovun təhsilin dirçəldilməsinə tətbiq etdiyi sistem kimlərinsə xoşuna gəlmir? Keçmiş təhsil naziri Misir Mərdanovun təhsil sistemini nə tez unutmuşuq? Yar-yarımçıq şəkildə Azərbaycan təhsilinə tətbiq etdiyi kurrikulm sisteminin baş-ayağını Mikayıl Cabbarov indi-indi yığmırmı? Düzdür, Azərbaycanın təhsil sistemi bərbad gündədir, amma bu bərbad sistemi Mikayıl Cabbarov yaratmayıb. Yaradan kənarda durub, yeni nazir isə o sistemi tamamilə dağıdıb, yerinə yenisini qurub. Etiraf etmək lazımdır ki, uğurlu da sistemdir. Bəli, 20-30 ilin müəllimi də imtahan olunmalıdır! İmtahandan keçə bilmirsə, o adam təhsil sistemindən tamamilə uzaqlaşdırılmalıdır. Əgər bir müəllim öz fənnindən suala cavab verə bilmirsə, onun keçdiyi dərs nə olacaq? Məhz belə müəllimlərdir bu gün Mikayıl Cabbarovun qarasınca deyinənlər. 

Qayıdaq “Qarabağ tarixi” dərsliyinə. Yaqub müəllim həmçinin bildirir ki, “bununla bizim mənəvi sistemimizə, ideologiyamıza zərbə vururlar və bu təxribatdır.” 

Nə vaxtdan tarix öyrənmək və ya öyrətmək mənəviyyata, ideologiyaya zərbə hesab edilir? Mənəviyyatımıza, ideologiyamıza zərbə vuraraq təxribat törədənlər kimlərdir? Kimlər özlərinə aid olmayan məsələlərə qarışanlar? Kitabın elmi redaktoru, AMEA Tarix İnstitutunun aparıcı elmi işçisi, tarix elmləri doktoru, professor C.M. Mustafayevmi, rəyçilər AMEA Tarix İnstitutunun elmi işlər üzrə direktor müavini, dosent T.H.Nəcəflimi, AMEA Tarix İnstitutunun “Qarabağ tarixi ” şöbəsinin böyük elmi işçisi, tarix üzrə elmlər doktoru N.R.Məmmədovmu, yoxsa müəllif AMEA Tarix İnstitutunun Qarabağ Tarixi Şöbəsinin müdiri, tarix elmləri doktoru Qasım Hacıyevmi? 

Diqqət etdinizmi?! Kitabın yazanı da, onun elmi redaktoru da, hətta rəy verənləri də AMEA Tarix İnstitutunun direktoru, millət vəkili Yaqub Mahmudovun işçiləridir! Özü də adi işçiləri deyillər. Biri kitabla adaş olan şöbənin müdiri, digəriləri institutun aparıcı elmi işçiləri və Yaqub müəllimin elmi işlər üzrə müavinidir

İndi kim deyə bilər, necə olur ki, bir institutun 4 nəfər aparıcı şəxsi, alimi, hətta biri şöbə müdir olmaqla kitab hazırlayır və institutun direktorunun ondan xəbəri olmur? Məncə bu absurddur!

Bir daha qayıdıram “Qarabağ tarixi” dərsliyinə. Müəllif deyir ki, “ermənilər özlərinin olmaya-olmaya Qarabağın hər daşına, ağacına bir kitab həsr ediblər, amma bizdə bir kitab narazılıq yaradır.” Adam haqlıdır, düz deyir. Bir həddə Yaqub müəllim də düz deyir: “Bir tarix var, o da Azərbaycan tarixidir.” Amma gəlin görək, biz tariximizi elə bir kitabla öyrənə bilirikmi? Xeyr! Çünki həmin kitab yığcam şəkildədir və bölgələrimizi kifayət qədər əhatə etmir. Niyə biz Gəncə-Qazax bölgəsinin tarixini ətraflı öyrənməyək, niyə biz Quba-Xaçmaz, Şəki-Zaqatala bölgəsinin tarixini ətraflı öyrənməyək, niyə biz Naxçıvanın, Lənkəran-Astaranın tarixini ətraflı öyrənməyək? Tariximizi mükəmməl bilmədiyimiz üçün itirə-itirə gedirik. Bəlkə orta məktəblərdə texnologiya, rəsm, musiqi kimi mənasız fənlərin tədrisindənsə tariximizi mükəmməl öyrənək? Çünki rəsmə, musiqiyə, sənət öyrənməyə meyli olan üçün ayrıca kurslar var, amma tarixi, özü də Azərbaycan tarixini öyrədən kurslar yoxdur. Milli Məclisdə bundan danışmaq lazımdır, yoxsa, işçim kitab yazıb, 2 ildir ondan dərs deyirlər, mən indi xəbər tutmuşam kimi sözlər gülünc doğurur.

Aqil Mehdi

Şərhler
Gülşən Şabanova tarafından 06-01-2017 14:11:13 Tarihinde yazıldı
Tariximiz
Mənim üçün bir Vətən və onun tarixi var. Mənim fikrimcə bir dərslik kimi deyil ayrica bir oxu kitabı kimi Qarabağ tarixi adlı kitabı qəbul edirəm. Amma bir dərslik kimi yox. Çünki Bir tarix kimi İstər Qarabağ tarixi istər Şəki tarixi və s. kimi tariximiz bir tarix kitabı Azərbaycan tarixi kitabı - adı altında cəmlənməlidir. Məncə bəsdir itirdikdən sonra qiymətləndirməyimiz. Hər şeyə vaxtında qiymət verəsən gərək. Vətənimin hər bir qarışına qiymət verib sevməyi öyrətmək lazımdır.
Bölmənin digər xəbərləri


® 2009 FAKTXEBER.COM - Azərbaycan Onlayn Xəbər Portalı

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


ƏLAQƏLƏR

  (+994 70) 870-47-49      (+994 55) 786-96-84

  [email protected]


Valyuta.com


Рейтинг@Mail.ru