Abituriyentlər, yuxarı sinif şagirdləri və təhsil işçiləri üçün elmi-metodiki və informatik materialların çap olunduğu “Abituriyent” jurnalının rəsmi internet səhifəsi açılıb. TQDK-dan verilən məlumata görə, qurumun təşəbbüsü ilə yaradılan www.abiturient.az internet səhifəsində jurnalın bütün buraxılışları, tədris və metodiki vəsaitlər, nəşrlər barədə müntəzəm, operativ məlumat almaq mümkündür.

Qeyd edək ki, jurnal 15 ildir dərc edilir. Jurnalın il ərzində dərc edilən nömrələrində imtahana hazırlıq, qəbul imtahanları, dərs vəsaitləri, ən çox bal toplayan abituriyentlər və sairə haqqında məlumat verilir.
Jurnalın son sayında 2009-cu ildə ali məktəblərə keçirilmiş qəbul imtahanlarında 600 baldan yuxarı nəticə göstərmiş gənclər haqqında məlumatlar dərc edilib.

Xatırladaq ki, 2009/2010-cu tədris ili üçün ali məktəblərə keçirilən tələbə qəbulu müsabiqəsində 110 minə yaxın abituriyent iştirak edib. Onlardan 996 nəfəri yüksək nəticə göstərərək 600-dən yuxarı bal toplayıb. Onlardan 670 nəfəri şəhər, 326 nəfəri rayon və kənd məktəblərinin məzunlarıdır.
Qəbul imtahanlarında 2 nəfər maksimal nəticə – 700 bal toplayıb.

Faktxeber.com