Kuba hökuməti ölkə vətəndaşlarına internetdən istifadə etməyi icazə verən bəyannamə qəbul edib. İnternetə çıxışın poçt xidməti vasitəsilə həyata keçiriləcəyi nəzərdə tutulub. Bunun üçün poçt müəssisələri kompüterlərlə təchiz olunacaq və vətəndaşlar bir saat üçün 1,67 ABŞ dolları ödəməklə internetlə işləyə biləcəklər.

Bundan əlavə evdən də Qlobal Şəbəkəyə çıxışın təmin olunması nəzərdə tutulur. Lakin bu zaman Kuba üçün küllü miqdarda vəsait ödəmək lazımdır – 150 dollar. Müqayisə üçün qeyd edək ki, burada aylıq əmək haqqı 17-20 dollar arasındadır. Bundan əvvəl bəzi vətəndaşlar yalnız bir sıra hökumət saytlarına daxil ola bilirdilər. İnternetə tam çıxışla yalnız alimlər, məmurlar, bəzi müəssisələr və elmi-tədqiqat institutları təmin olunurdu. Cari ilin avqust ayında kubalılara xarici vətəndaşların qaldığı otellərdə internetdən qeyri-rəsmi istifadə etməyə icazə verilib. Bu cür xidmətlərin qiyməti 7 dollar təşkil edirdi. Ötən il isə ölkə vətəndaşlarına personal kompüterlər, DVD-qurğular və mobil telefonlar almağa dair qadağa ləğv olunub.