Daha bir TƏBİB rəsmisinin ailə üzvləri arasında koronavirusa yoluxma faktı qeydə alınıb. R.Əliyevanın anasının COVİD-19 testi pozitiv çıxıb.

Bu barədə “Tibbi Ərazi Bölmələrinin İdarəetmə Birliyinin” (TƏBİB) mətbuat katibi Rəvanə Əliyeva məlumat verib.

O bildirib ki, təəssüf ki, COVID-19 onun da ailə üzvlərindən yan keçməyib:

“Ötən gün anamdan COVID-19-a görə götürülən test nəticələrinin cavabı pozitiv (müsbət) çıxıb. Artıq pandemiya üzrə xəstəxanada müalicəsini davam etdirir. Mən onlarla birlikdə qalmıram, yaxın ünsiyyətim olmayıb. Amma onun yaxın ünsiyyətdə olduğu digər ailə üzvlərimizdən də koronavirus testi götürülüb”.

Qeyd edək ki, adıçəkilən qurumun mətbuat xidmətinin rəhbəri bir neçə gün öncə "Facebook" səhifəsində yazı paylaşaraq insanları daha diqqətli olmağa, məsuliyyətli davranmağa çağırmışdı.

Xatırladaq ki, ötən gün TƏBİB-in İdarə Heyətinin sədri Ramin Bayramlı yaxın qohumları arasında koronavirusa yoluxan şəxslərin olduğunu qeyd etmişdi.