Klivlend Klinikasının (ABŞ) alimləri koronavirus infeksiyasını proqnozlaşdırmaq və diaqnoz etmək üçün yeni üsul tapıblar. Tədqiqatın ilkin nəticələri "Chest" jurnalında çap edilib.

Problemin tədqiqi çərçivəsində mütəxəssislər, COVID-19 olan 12 min xəstənin xəstəlik tarixlərinin təhlilini aparıblar. Tədqiqata əsasən, koronavirusdan effektiv qorunma üsullarını izah edən nümunələr müəyyən edilib. Həkimlər koronavirusun müalicəsində və qarşısının alınmasında istifadə edilə bilən 16 preparat və üç dərman vasitəsini təyin ediblər.

"Məsələn, apardığımız araşdırmalar göstərdi ki, melatonin COVID-19 testində nəticənin müsbət çıxması riskini azaldır", - deyə aparıcı tədqiqatçı doktor Maykl Kattan bildirib. "Pnevmokok" peyvəndi və qrip peyvəndi vurulmuşların, peyvənd olunmayanlara nisbətən daha yüksək yoluxma riski olduğu aşkarlanıb. Mütəxəssislər tapıntıların əlavə yoxlanmaya ehtiyacı olduğunu vurğulayıb.

"Bizim tapıntılar bir sıra risk faktorlarını təsdiqlədi. Məsələn, yaşlı kişilərin digər sosial qruplara nisbətən koronavirus xəstəliyinə daha çox həssas olması", - deyə Kattan əlavə edib. Bundan əlavə alim, səbəb-nəticə əlaqələri olmayan və sınaqdan keçirilməli vacib bir neçə maraqlı əlaqədən də danışıb.

Ayrıca, özəl klinikadakı mütəxəssislər COVID-19 xəstəliyinin ehtimalını təxmin edə biləcək onlayn kalkulyator yaradıblar. Alət, yaş, cins, etnik mənşə, xroniki xəstəliklərin olub olmaması və yaşadığı bölgə də daxil olmaqla bir şəxs haqqında məlumatlar əsasında işləyir.