ABŞ prezidenti Donald Tramp və Şimali Koreya lideri Kim Çen In arasında Sinqapurda keçirilən zirvə görüşünün ikinci ildönümündə Şimali Koreyanın Xarici İşlər Naziri Ri Son Qvon münasibətlərin yaxşılaşacağına dair ümidlərə kölgə salan açıqlama ilə gündəmə gəlib.

"Zirvədən iki il keçdi. Şimali Koreya ilə ABŞ arasındakı münasibətləri yaxşılaşdırmağa dair ümid bitdi. Koreya yarımadasında sülh və firavanlıq üçün nikbinlik yox oldu", - deyə Ri söyləyib.

Şimali Koreya və ABŞ xalqlarının daha yaxşı münasibətlər istədiklərini, lakin Koreya yarımadasında vəziyyətin hər gün daha da pisləşdiyini bildirən Ri, Şimali Koreya lideri Kim Çen Inın da qatıldığı son hərbi komissiya iclasında, "ABŞ-ın sonsuz nüvə müharibəsi təhdidlərini həll etmək üçün milli nüvə sənayesinə dəstəyi artırmaq" barədə danışıldığını söyləyib.

Ri, Şimali Koreyanın hələ də ABŞ-ın prioritet nüvə hücum hədəfləri siyahısında olduğunu, Vaşinqton rəhbərliyinin Cənubi Koreya ordusuna milyardlarla dollarlıq müasir hərbi texnikalar, məsələn, gəmi təyyarələri və kəşfiyyat dronları verdiyini, bunun isə ABŞ-ın dövlətlərinə, sistemlərinə və xlaqlarına uzunmüddətli bir təhdid planladığının sübut olduğunu vurğulayıb.

Şimali Koreyanın ABŞ ilə danışıqlar çərçivəsində bir nüvə sınağı sahəsini bağladığını, onlarla Amerikan hərbi əsirinin qalıqlarını geri qaytardıqlarını və ABŞ məhbuslarına xüsusi amnistiya verdiklərini xatırladan Ri, "bir də heç zaman ABŞ prezidentinə əvəzi olmadan qazanc paketi verməyəcəyik. Heç bir şey boş vəddən daha çox ikiüzlülük ola bilməz", - söyləyib.