Yaponiyanın Yokohama şəhərində “Diamond Princess” gəzinti gəmisində 10 sərnişində koronavirus aşkarlanıb.

Bu barədə Kyodo News Yaponiyanın Səhiyyə, Əmək və Sosial Müdafiə Nazirliklərinə istinadən xəbər verib. 

Səhiyyə naziri Kato Kasunobu bildirib ki, karantində olan sərnişnlərdə yeni növ təhlükəli virusun olduğu müəyyənləşdirilib.

"Biz gəminin bütün sərnişinlərini və heyətini tibbi baxışdan keçirdik. Yoluxmuş insanlarla ünsiyyət saxlayan və xəstəliyin simptonları olan 273 nəfərdən analizlər götürülüb. Hazırda 31 nəfərin yoxlamasının cavablarını əldə etmişik ki, onlardan 10 nəfər bu virusun daşıyıcısıdır. Virusun aşkarlandığı sərnişinlər xəstəxanalara göndəriləcək." 

Nazir bildirib ki, onların arasında ağır vəziyyətdə olan yoxdur. Eyni zamanda Kato Kasunobu digər sərnişinlərin və heyət üzvlərinin daha 14 gün gəmidə qalması arzusunu ifadə edib. 

"Biz istərdik ki, onlar 14 gün gəmidə qalsınlar. Sərnişinlərin və komandanın sağlamlıq vəziyyətini izləyəcəyik və bütün səylərimizi yoluxmanın genişlənməsinin qarşısını almağa yönəldəcəyik”, - nazir qeyd edib.

Qeyd edək ki, gəmidə ümumilikdə 3,7 min sərnişin və ekipaj üzvü var.

Gəmiyə isə sahilə yaxınlaşmağa hələlik icazə verilmir.

Yaponiyalı rəsmilər gəminin karantin müddətinin iki həftə davam edəcəyini bildirib