Xəbər Lenti

İnfoqrafika

Arxiv

Yazar

19 Sentyabr

2019
14:08
1061
Hüseyn Abdullayevə 8 il cəza istənildi

Sabiq deputat Hüseyn Abdullayev məhkəməsi davam etdirilib.

Bakı Hərbi Məhkəməsində sabiq deputat Hüseyn Abdullayev, onun anası Zeynəb Abdullayeva və onlarla birlikdə ittiham olunan Həbib İbrahimov, Xalid Əliyev, Namiq Babayev, İntiqam Süleymanov, Pərviz Kazımov, Zaur Quliyev və Nazim Əliyevin cinayət işi üzrə məhkəmə iclası baş tutub.

Bu gün keçirilən iclasda dövlət ittihamçısı çıxış edib.

Prokuror Hüseyn Abdullayev və digərlərinin əməllərinin məhkəmə istintaqında sübuta yetirildiyini bildirib.

Dövlət ittihamçısı çıxış edən zaman Hüseyn Abdullayev bir neçə dəfə müdaxilə edərək deyilənlərin yalan olduğunu, heç bir sübut olmadan həbs edildiyini deyib. Hakim H.Abdullayevə xəbərdarlıq edib. Bildirib ki, növbəti dəfə çıxışa müdaxilə edərsə, zaldan çıxarılacaq.

Prokuror çıxışında təqsirləndirilən şəxslərə ittiham olunduqları maddələrlə aşağı həddən də aşağı cəza təyin edilməsini istəyib.

Belə ki, prokuror Hüseyn Abdullayevin 7 il 6 ay müddətinə azadlıqdan məhrum edilməsini istəyib. Həmçinin onun daha əvvəl ittiham olunduğu qəsdən sağlamlığa az ağır xəsarət yetirmə və xuliqanlıq maddələri ilə aldığı 2 il şərti cəzanın da bu cəza ilə birləşdirilməsini və qəti olaraq H.Abdullayevin 8 il müddətinə azadlıqdan məhrum edilməsini istəyib.

Hüseyn Abdullayev bu cəzaya etiraz edib və ittihamın sifariş olduğunu deyib.

Hakim Hüseyn Abdullayevin zaldan çıxarılması göstərişini verib.

Bu zaman Hüseyn Abdullayevin anası Zeynəb Abdullayevin halı pisləşib. Məhkəmə təcili tibbi yardım çağırılıb. Z.Abdullayeva məhkəmə zalından çıxarılıb.

Prokuror çıxışının davamında təqsirləndirilən şəxslər Namiq Babayevin 8 il, İntiqam Süleymanovun 6 il, Nazim Əliyevin 6 il müddətinə azadlıqdan məhrum edilmələrini istəyib.

Hazırda ev dustaqlığında olan Dövlət Sərhəd Xidmətinin əməkdaşlarına da prokuror cəza istəyib.

Prokuror həmin şəxslər- Zaur Quliyev, Pərviz Kazımov, Həbib İbrahimov və Xalid Əliyevin şərti azadlıqdan məhrum edilmələrini istəyib.

Hüseyn Abdullayevin anası isə 5 min manat cərimə edilməklə barəsində başqa yerə getməmək haqqında iltizam qərarı çıxarılıb.

Dövlət ittihamçısı Vergilər Nazirliyinin mülki iddialarının təmin edilməsini, Hüseyn Abdullayevin üzərinə həbs qoyulmuş əmlaklarının müsadirə edilməsini istəyib.

Vergilər Nazirliyinin nümayəndələri də dövlət ittihamçısı ilə razılaşıb və mülki iddianın təmin edilməsini istəyib.

Vəkillər müdafiə çıxışı üçün 2 həftə vaxt istəsə də hakim növbəti məhkəmə iclasını sentyabrın 24-ə təyin edib.

Xatırladaq ki, hazırlıq iclasında Dövlət Sərhəd Xidmətinin sabiq əməkdaşları, iş üzrə təqsirləndirilən Xalid Əliyev, Həbib İbrahimov, Zaur Quliyev və Pərviz Kazımovun vəkilləri çıxış edib. Vəkillər vəsatət qaldıraraq, onların barəsində seçilmiş həbs qətimkan tədbirinin ev dustaqlığı ilə əvəz edilməsini istəyib. Həmin şəxslər H.Abdullayevin anasına sərhəddi keçərkən kömək etməkdə ittiham edilirlər. Vəsatətlər təmin olunub və hər üç şəxs ev dustaqlığına buraxılıb.

Qeyd edək ki, Azərbaycan Respublikasının Vergilər, Daxili İşlər nazirlikləri və Baş Prokurorluğun mətbuat xidmətlərinin birgə yaydığı məlumata əsasən, Vergilər Nazirliyi tərəfindən aparılmış səyyar vergi yoxlaması nəticəsində “Araz İNC” MMC-də 1 milyon 436 min manat məbləğində vəsaitin dövlət büdcəsinə ödəməməsi faktı üzrə 7 iyun 2013-cü il tarixdə Cinayət Məcəlləsinin 213.2.2-ci (vergi ödəməkdən yayınma) maddəsi ilə cinayət işi başlanıb.

Onun barəsində məhkəmə qərarı əsasında həbs qətimkan tədbiri seçilməklə “İnterpol” xətti ilə beynəlxalq axtarış elan olunub.

3 oktyabr 2016-cı il tarixdə H.Abdullayevə ümumilikdə 1 milyon 810 min manat məbləğində vergiləri dövlət büdcəsinə ödəməkdən yayındırması və xüsusi razılıq (lisenziya) tələb olunduğu halda belə razılıq almadan tikinti-quraşdırma işlərini həyata keçirərək 966 min manat məbləğində gəlir əldə etməsinə əsaslı şübhələr müəyyən edildiyindən Cinayət Məcəlləsinin 192.2.2 (qanunsuz sahibkarlıq) və 213.2.2-ci maddələri ilə yenidən ittiham elan edilməsi barədə qərar çıxarılıb.

Təqsirləndirilən şəxs H.Abdullayev Türkiyə Respublikası ərazisində tutularaq 22 aprel 2018-ci il tarixdə Azərbaycan Respublikasının hüquq mühafizə orqanlarına təhvil verilib.

Bundan başqa ayrı-ayrı şəxslərin Baş Mütəşəkkil Cinayətkarlıqla Mübarizə İdarəsinə daxil olmuş müraciətləri əsasında 14 fevral 2018-ci il tarixdə başlanmış cinayət işi üzrə H.Abdullayevin 2006-cı ildən 2018-ci ilədək olan müddət ərzində faktiki nəzarət etdiyi “Araz-İnşaat” ASC-də onun tapşırığına əsasən müəssisənin idarə olunmasını həyata keçirən Babayev Namiq İsmixan oğlu və qeyriləri ilə qabaqcadan əlbir olan bir qrup şəxs halında cəmiyyətə məxsus obyektləri müxtəlif vaxtlarda ayrı-ayrı şirkətlərə icarəyə verərək ümumilikdə 1 milyon 374 min manat məbləğində gəlirlərin cəmiyyətin kommunal xidmət və sair xərclərinin ödənilməsinə sərf olunmasına dair digər səhmdarlara yalan məlumat verməklə 13 min 373 manat məbləğində dividentləri vahid qəsdlə ələ keçirib zərərçəkmiş şəxslərə xeyli miqdarda maddi ziyan vurmaqla dələduzluq etməsinə şübhələr müəyyən edilib. Eləcə də H.Abdullayevin dəfələrlə N.Babayev vasitəsilə, daha sonra isə Almaniyadan istifadəsində olan telefondan “Autist Uşaqların Reablitasiyasına Kömək” İctimai Birliyinin sədri Elnur Məmmədova zəng edərək onun və ailə üzvlərinin ünvanına nəlayiq ifadələr işlədib tələblərinə əməl etməyəcəyi halda onları məhv edəcəyi ilə hədələyərək icarə müqaviləsi şərtlərinə görə hər ay ödəməli olduğu 3 min manat icarə haqqı əvəzinə onun nümayəndələrinə 6 min manat pul ödəməsini hədə-qorxu ilə tələb etməsinə əsaslı şübhələr müəyyən edildiyindən o, Cinayət Məcəlləsinin 178.2.1 (dələduzluq), 178.2.2, 178.2.4, 182.2.1 (hədə-qorxu ilə tələb etmə), 182.2.2 və 182.2.4-cü maddələri ilə təqsirləndirilən şəxs qismində cəlb edilməklə həmin maddələrdə nəzərdə tutulmuş ittiham elan edilib.

Hüseyn Abdullayev ittihamla özünü təqsirli bilmir.(musavat.com)

Məqalədə : Hüseyn Abdullayev 
Xəbərlərimizi Faktxeber.com-un facebook səhifəsində də izləyə bilərsiniz.
Mətndə səhv varsa, həmin səhvi seçib Ctrl + Enter düyməsini basaraq bizə göndərin

Sabahın hava proqnozu açıqlanıb

15

Oktyabr
12:48
ÖLKƏ
21

Everestin hündürlüyü yenidən ölçüləcək

15

Oktyabr
11:32
ELM / TƏHSİL
37

Bakıda 10 məktəb direktoru işdən çıxarılıb

15

Oktyabr
11:14
ELM / TƏHSİL
580

DİN: Ötən gün yol qəzalarında 2 nəfər ölüb

15

Oktyabr
11:07
HÜQUQ,HADİSƏ
23

Bakıda avtobus minik avtomobili ilə toqquşdu

15

Oktyabr
10:04
HÜQUQ,HADİSƏ
45

Xarici valyutaların manata qarşı məzənnələri

15

Oktyabr
09:55
İQTİSADİYYAT
64

Neftin ucuzlaşması davam edir

15

Oktyabr
09:17
İQTİSADİYYAT
57
Mövzu üzrə xəbərlər
Bölmənin digər xəbərləri


® 2009 FAKTXEBER.COM

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


15-10-2019 13:15



  (+994 55) 786-96-84

  [email protected]

Valyuta.com

Рейтинг@Mail.ru