Fələstin "Qızıl Aypara" Cəmiyyəti tərəfindən yayımlanan mətbuat açıqlamasında, İsrail rejimi əsgərləri tərəfindən açılan atəş nəticəsində 5 fələstinlinin plastik güllədən yaralandığı, 6 nəfərin isə istifadə edilən gözyaşardıcı qazdan boğulma təhlükəsi ilə üzləşdiyi bildirilir. İstifadə edilən qazdan əziyyət çəkənlər arasında 2 aylıq bir körpənin də olduğu vurğulanıb.

FaktXəbər-in məlumatına görə, şahidlər bildirirlər ki, İordan çayının qərb sahilində yerləşən Nablus şəhərindəki "Yusif məqamı" kimi tanınan yerə yüzlərlə yəhudinin ayin üçün girdiyi zaman fələstinlilərlə İsrail əsgərləri arasında qarşıdurma baş verdi.

Yəhudilər Nablus şəhərində yerləşən "Yusif məqamı"nda Həzrəti Yusifin (ə) qəbri olduğuna inanır. Ancaq bir çox arxeoloq həmin qəbirin yalnız bir neçə əsr tarixi olduğunu qeyd edərək, bu inancın doğru olmadığını, qəbirin Yusif əd-Duveykat adlı müsəlmana aid olduğunu bildirir.

Digər tərəfdən, İsrail ordusu martın 19-da öldürdüyü Ömər Əbu Leylanın İordan çayının qərb sahilində yerləşən Selfit mahalındakı ailəsinə məxsus evini partlayıcılarla dağıdıb.

Şahidlər bildirirlər ki, gecə basqın edən İsrail əsgərləri Əbu Leylanın evi və ətrafındakı evləri boşaltdıqdan sonra yerləşdirdiyi partlayıcı maddələrlə evi dağıdıb.

Basqın zamanı partlayışa mane olmaq istəyən fələstinlilərlə İsrail əsgərləri arasında qarşıdurma baş verib. İsrail əsgərləri izdihamı dağıtmaq üçün gözyaşardıcı qaz atıb, həmçinin həqiqi və plastik güllələrdən atəş açıb.