Xəbər Lenti

İnfoqrafika

Arxiv

Yazar

15 Oktyabr

2018
14:15
Azərbaycanlı alim evindən oğurluq edənləri bağışladı

Alimin evindən 1 milyon manata yaxın oğurluq etməkdə təqsirləndirilən şəxslər növbəti dəfə hakim qarşısına çıxarılıblar.

Bakı Ağır Cinayətlər Məhkəməsində külli miqdarda pul və qızıl-zinət əşyaları oğurlamaqda təqsirli bilinən Xanım Zeynalova və Aqşin Qəhrəmanovun cinayət işi üzrə növbəti məhkəmə iclası keçirilib.

Hakim Əfqan Hacıyevin sədrliyi ilə keçirilən məhkəmə iclasında hökm oxunub.

Hökmə əsasən Xanım Zeynalova və Aqşin Qəhrəmanova şərti cəza verilib.

Onların hər ikisi məhkəmə zalından azadlığa buraxılıb.

Qeyd edək ki, zərərçəkmiş Azərbaycan Milli Elmlər Akademiyası Mərkəzi Elmi Kitabxanasının keçmiş direktoru, filologiya elmləri doktoru Aybəniz Əliyeva hər iki şəxsi bağışlayıb.

İttihama görə, Xanım Zeynalova Aybəniz Əliyevanın Nəsimi rayonundakı mənzilində qulluqçu işləyib. X.Zeynalovanın 2015-ci ilin yanvar ayından 2017-ci ilin may ayına qədər işlədiyi mənzildən külli məbləğdə pul və qızıl-zinət əşyaları oğurladığı qeyd edilir.

Xanım Zeynalova barəsində Nəsimi Rayon Məhkəməsinin qərarı ilə 4 aylıq həbs-qətimkan tədbiri seçilib. Cinayət işi materiallarında göstərilir ki, istintaq Xanım Zeynalovanın oğurluğu Aqşin Qəhrəmanovla birlikdə törətdiyini üzə çıxarıb. İttihama görə, alimin evindən ümumilikdə 539 min dollar və 179 min manat məbləğində qızıl-zinət əşyaları oğurlanıb. Təqsirləndirilən şəxslərə Cinayət Məcəlləsinin 177.3.2-ci (oğurluq; külli miqdarda ziyan vurmaqla törədildikdə) maddəsi ilə ittiham elan edilib.

Xatırladaq ki, Xanım Zeynalovanın atası Əbdüləli Zeynalov mətbuata müraciət edərək qızının günahsız olduğunu deyib. Əbdüləli Zeynalov bildirib ki, qızı 2010-2014-cü illərdə Aybəniz Əliyevanın evində xidmətçi işləyib. Bu müddətdə Xanımın Aybəniz Əliyevanın qızı, hazırda Azərbaycan Dövlət Mədəniyyət və İncəsənət Universitetinin prorektoru olan Gülşən Əliyeva ilə münasibəti yaxşı olub: "Qızım Xanım bir neçə dəfə Gülşənə ailə məsələlərində kömək edib, bunun müqabilində isə o, qızıma 2 qızıl-zinət əşyasını verib. Onu da qeyd edim ki, evimizdə yoxlanış aparılan zaman elə həmin qızıllar sübut kimi göstərilib. Sonradan ailə arasında tez-tez xoşagəlməz mübahisələr yaranmağa başlayıb. Odur ki, Xanım işindən ayrılıb".

Ə.Zeynalov deyib ki, qızı həbs edilən zaman Bakı Metropolitenində işləyib.

Zərərçəkmiş Aybəniz Əliyeva isə açıqlamasında cinayət faktının təsdiqləndiyini bildirib: "Oğurluq edən şəxs də həbsdədir. Biz nüfuzlu ailəyik, evimizdə oğurluq olunması bizim günahımız deyil. Odur ki, adımızın belə məsələlərdə hallanmasını istəmirik". (musavat.com)

Mətndə səhv varsa, həmin səhvi seçib Ctrl + Enter düyməsini basaraq bizə göndərin
Məqalədə : alim cinayət 
Bölmənin digər xəbərləri


® 2009 FAKTXEBER.COM - Onlayn Xəbər Portalı

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


15-11-2018 14:17



  (+994 55) 786-96-84

  [email protected]

Valyuta.com