Dünya Uşaqları Müdafiə Hərəkəti Fələstin şöbəsindən verilən yazılı açıqlamada, İsrail rejimi silahlı qüvvələrinin qəsdən öldürmək, ya da xəsarət yetirmək məqsədilə fələstinli uşaqları birbaşa hədəf aldığı qeyd olunub.

FaktXəbər bildirir ki, fələstinli uşaqların baş verən hadisələr zamanı İsrail qüvvələrinə qarşı heç bir təhdid yaratmadığı vurğulanır. Açıqlamada İsrail döyüş təyyarələrinin dörd gün əvvəl Qəzza zolağına endirdiyi zərbələr zamanı şəhid edilən 1,5 yaşlı qız uşağı Bəyan Əbu Hamaş ilə hamilə anasının məsumluğuna diqqət çəkilib.

İsrailin 2018-ci ilin əvvəlindən bu yana işğal altındakı Fələstin torpaqlarında 37 uşağı öldürdüyü bildirilən açıqlamada, İsrail qüvvələrinin eyni zamanda fələstinli uşaqların orqanizmlərində xəsarətlər yaradan bəzi təcrübələr apardığı vurğulanıb.

İsrail snayperlərinin hədəfi olan 13 uşaqdan bəzilərinin görmə qabiliyyətini tamamilə itirdiyi, bəzilərinin isə ayaqlarını itirərək əlil olduğu bildirilir.

Bəyanatda həmçinin ümumbəşəri hüquqa və ya İsrail qanunlarına zidd olaraq atəş açan əsgərlərlə bağlı peşəkar, şəffaf və müstəqil istintaq açılması tələb olunur. Başda uşaqlar olmaqla öldürmə və ya şikəst etmə məqsədilə atəş açan əsgərlərin də məhkum edilməsi çağırışı edilib.