Yəmən Ali İnqilab Komitəsinin rəhbəri Kanadaya öz səfirliyini Sənada açmasını  təklif edib. FaktXeber.com-un Əl-Aləm-ə istinadla  verdiyi məlumata görə, bu təklif Səudiyyə Ərəbistanının Kanada səfirini ölkədən çıxarmasından sonra irəli sürülüb.

Bildirilir ki, Muhəmməd Əli əl-Husi öz Tvitter səhifəsində belə yazıb: «Kanada hökumətini Yəməndə öz səfirliyini açmasını təklif edirik və Səna bunu alqışlayır».

Xatırladaq ki, Səudiyyə Ərəbistanının Xarici İşlər Nazirliyi Kanadadan səfirini geri çağırıb. Rəsmi ər-Ryad həmçinin Kanadanın ölkəsindəki səfirinə Səudiyyəni tərk etmək üçün 24 saat vaxt verib. Ər-Riyad bundan başqa Kanada ilə yeni ticarət və investisiya razılaşmalarını da dondurub.

Qeyd edək ki, iki ölkə arasında münasibətlər Ottavanın Krallıqda saxlanılmış mülki fəalların azad olunmasına çağırış etməsindən sonra gərginləşib. Avqustun 3-də Kanada XİN-i Krallıqda mülki fəalların saxlanılması ilə bağlı narahatlığını ifadə edib və Səudiyyə Ərəbistanını onları dərhal azad etməyə çağırıb. Krallıq XİN-i Kanadanın mövqeyini Səudiyyənin daxili işlərinə müdaxilə etmək və beynəlxalq hüququn əsaslarına zidd addım kimi qiymətləndirib.