Xəbər Lenti

İnfoqrafika

Arxiv

Yazar

30 May

2018
10:23
Qəbələ və Şəkidə qiymətlər çox bahadır - RƏSMİ

Azərbaycan turizm növlərinin müxtəlifliyi ilə seçilir. Biznes, istirahət, sağlamlıq, idman turizmlərini buna  misal göstərmək olar. Odur ki, kifayət qədər turizm potensialı olan Azərbaycan bu sahədə dünyanın aparıcı ölkələri ilə rəqabətə girməyə və öz imkanlarını nümayiş etdirməyə qadirdir. Artıq beynəlxalq tədbirlərin keçirildiyi məkana çevrilən Azərbaycanda turizm sərgilərinin təşkili bu sahəyə olan marağın göstəricisidir.

Bəs bu il Azərbaycana gələn turistlərin sayında  artım müşahidə olunacaqmı? Eyni zamanda daha çox hansı ölkələrdən turistlər gələ bilər?

“Orucluqdan sonra turistlərin sayı çoxalacaq”

Azərbaycan Turizm Assosiasiyası sədrinin müşaviri Müzəffər Ağakərimov bildirib ki, turizmlə bağlı müəyyən problemlər qalsa da, son illər Azərbaycan bölgələrində çalışan kadrların, turizm üzrə fəaliyyət göstərən obyektlərin təcrübəsi artır:

“Bununla yanaşı, hələ də çatışmazlıqlar mövcuddur. Xidmət səviyyəsinin yaxşı olması, treninqlərin keçirilməsi mütləq lazımdır. Yay aylarında Azərbaycana ilk növbədə Rusiyadan, Belarusdan turist axını olur.  Daha çox müalicəvi turizm növünə diqqət var. Məsələn, Naftalanda, Qalaaltıda, Masallı və digər yerlərdə bu cür turizm növünə müraciət edilir. O cümlədən vizanın sadələşdirilməsi ilə əlaqədar ərəb ölkələrindən də turistlərin axını gözlənilir. Əlbəttə, orucluq qurtarandan sonra turistlərin sayı daha da çox olacaq. Elə müsəlman ölkələri var ki, Ramazanla bağlı olaraq digər ölkələrə səyahət etmirlər. Turistlər  nəinki Bakıya, həm də regionlarımıza üz tuturlar”.

“Regionlarda 1 və 2 ulduzlu otellər olmalıdır”

M.Ağakərimovun sözlərinə görə, bölgələrdə qiymətlərin qənaətbəxş olduğunu demək olmur:

“Ümumiyyətlə Azərbaycan Turizm Assosiasiyası öz növbəsində tövsiyələr verir. İlk növbədə bölgələrdə qiymətlərin göstərilən xidmətə uyğunluğunu qeyd etməliyik. Elə menecerlər , sahibkarlar, idarəetmə strukturları var ki, qiyməti yüksək göstərsə də, xidmət çox aşağıdır. Xüsusilə Qəbələdə, Şəkidə bu gün qiymətlər çox bahadır.  Buna yol vermək olmaz. Daha çox müraciət üçün xidmət səviyyəsi yüksəldilməlidir. Eyni zamanda, daxili turizm də inkişaf edir, yerli əhali də bölgələrdə istirahət etmək istəyir. Qiymətlər  müvafiq olarsa, bölgələrə üz tutanların da sayı artar. Bunun üçün  həmin regionlarda 1 və 2 ulduzlu otellər olmalı, rəqabət getməli və bunun sayəsində qiymətlər aşağı düşməlidir”.

“Turpaket alan zaman mütləq müqavilə tələb edin”

Müsahibimiz  turizm şirkətləri tərəfindən aldadılan  insanlardan da söz açıb:

“Əhali Dövlət Turizm Agentliyinə, Azərbaycan Turizm Assosiasiyasına müraciət edərək, hansı turizm şirkətlərindən turpaket almalı olduğunu öyrənə bilər. Çünki bu sahədə dələduzlar çoxdur. İnsanlar turpaket alan zaman mütləq müqavilə, sığorta tələb etsinlər. Turizm şirkətilə insan arasında xidmətlərlə bağlı müqavilə olmalıdır.  İnsanlar bazarda təcrübəsi olan, tanınmış turizm şirkətləri ilə iş birliyində olsalar, daha yaxşıdır. Müqavilə olmadığı halda sonradan problemlər yaranır”.

M.Ağakərimov deyib ki, hazırda Yaxın Şərqdə, Suriyada, Şimali Afrika ölkələrində siyasi vəziyyət yaxşı olmadığı üçün azərbaycanlıların ora üz tutması məsləhət deyil:

“Məsələn, əvvəllər  azərbaycanlı turistlər Misirə çox gedirdilər. Amma indi vəziyyət tamamilə dəyişib. Ümumiyyətlə turizm təcrid olunmuş sahə deyil. Bu sahə sosial, siyasi, iqtisadi məsələlərlə birbaşa bağlıdır.  Buna görə də insanlar hər hansı ölkəyə gedən zaman o ölkə haqqında əvvəlcədən məlumat toplamalıdır”.(modern.az)

Mətndə səhv varsa, həmin səhvi seçib Ctrl + Enter düyməsini basaraq bizə göndərin
Məqalədə : Qəbələ Şəki 
Bölmənin digər xəbərləri


® 2009 FAKTXEBER.COM - Onlayn Xəbər Portalı

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


18-10-2018 22:45



  (+994 70) 870-47-49       (+994 55) 786-96-84

  [email protected]

Valyuta.com