AMEA Nəsimi adına Dilçilik İnstitutunda Orfoqrafiya Komissiyasının növbəti iclası keçirilib. İclasda Azərbaycan dilinin orfoqrafiya qaydalarının təlim və tərtib prinsipləri müzakirə olunub. Tədbirdə yeni “Orfoqrafiya lüğət”ində ediləcək bəzi dəyişikliklər də diqqətə çatdırılıb. “Əsgər” sözünün “əskər”, “alqı-satqı” sözünün “alğı-satqı” yazılması təklifi məqbul sayılıb. 

Bəs görəsən lüğətimizdə edilən bu dəyişikliklərə nə dərəcədə ehtiyac var. FaktXeber.com məsələ ilə əlaqədar millət vəkili, şərqşünas Araz Əlizadədən münasibət öyrənib.

Millət vəkilinin sözlərinə görə, dilimizdə böyük dəyişikliklərə ehtiyac yoxdur: “Mənə elə gəlir ki, dilimiz də orfoqrafiyamız da çox mükəmməldir. Lakin son illər bizim dilimiz intensiv şəkildə zibilləşir, ona uyğun olmayan hərflər, sözlər gəlir. Yəqin alimlər fikirləşiblər ki, dili daha çox tələffüzə uyğunlaşdırsınlar, tələffüzü dilə uyğunlaşdırmaq əvəzinə.”