Əl-Qaidə terror təşkilatının keçmiş lider Üsamə bin Ladenin 3 həyat yoldaşı ilə uşaqlarının Pakistandan deportasiya edildiyi bildirilir.

FaktXeber.com-un verdiyi məlumata görə, Bin Laden ailəsi güclü təhlükəsizlik tədbirləri altında paytaxt İslamabaddan xüsusi təyyarəylə Səudiyyə Ərəbistanına göndərilib.

LADENİN SON SÖZLƏRİ

Bu arada isə "Time" jurnalı Əl-Qaidənin keçmiş lideri Üsamə bin Ladenin son sözlərini dərc edib. Xəbərdə Bin Ladenin son olaraq dörd yoldaşından biri olan Əməllə danışdığı bildirilir. "Time" həmçinin Pakistanda gizli şəkildə yaşadığı evində öldürülün terrorbaşının son günlərinə aid təəccüblü materiallar da yayımlayıb.

"Time"a görə, amerikalıların Abbottabaddakı evdə əməliyyat başlatdığı 2 may 2011-ci il səhəri silah və partlayış səsləri eşidildikdə, Bin Ladenin 20 yaşlı qızı Məryəm, təlaşla yuxarı mərtəbəyə qalxıb və atasına nə olduğunu soruşub. Əl-Qaidə lideri qızına, "aşağı düş və yatağına gir" əmrini verib.

Bin Laden daha sonra evdə olan dörd yoldaşından biri olan Əmələ son sözlərini söyləyib: "İşığı yandır."

Ancaq Bin Ladenin bu istəyi yerinə yetməyib, çünki evdə olan mühafizəçilərdən biri əməliyyat başlayan kimi təhlükəsizlik məqsədi ilə evin elektrik xəttini bağlayıbmış. Daha sonra isə əməliyyat başlayıb və Bin Laden ölü şəkildə ələ keçirilib.

PANETTANIN QEYDİ

"Time" jurnalı bu sayında ayrıca olaraq ABŞ prezidenti Barak Obamanın əməliyyat qərarı verdiyi gün, MKİ rəhbəri Leon Panettanın bu mövzuyla əlaqədar yazdığı qeydin bir nüsxəsini də yayımlayıb. İndi Müdafiə Naziri olan Panettanın 29 aprel 2011-ci il tarixli qeydində isə deyilir:

Aprel 29, 2011, saat 10.36

Tom Donilon zəng vurdu. Donilon, prezidentin AC1 (Abbottabaddakı evə verilən kod ad - red.) barədə qərar verdiyini söylədi. Qərar, əməliyyatı təşkil etmək istiqamətində idi. Vaxt, əməliyyata başlamaq əmri və idarəetmə admiral McRavenin səlahiyyətindədir. Əməliyyatın təsdiqi, Prezidentə təqdim edilən risk hesabatından alınıb. Bundan əlavə yeni risklər aşkar ediləcəyi halda, bunlar yenidən prezidentlə məsləhətləşmək üçün ona çatdırılacaq. Əmr, gedib Bin Ladeni almaq və əgər orada deyilsə, çıxıb getmək şəklindədir. Bu məlumatlar saat 10.45-də admiral McRavenə çatdırıldı.

Cavad Turan