Xəbər Lenti

Sorğu

İnfografika

Arxiv

18 Oktyabr

2017
11:23
5664
Zibillikdə gəzənlər üçün şad xəbər: milyonçu olmaq şansınız var

FaktXəbər-in verdiyi məlumata görə, Bakıda boş plastik butulkaları təhvil vermək üçün "fandomatlar" qoyulacaq. Bu barədə Sputnik-ə Ecobox özəl şirkətinin baş direktorunun müavini Fuad Ağayev məlumat verib.

Onun sözlərinə görə, ilk test aparatları Bakıya oktyabrın sonlarında gətiriləcək. İlin sonunda isə Azərbaycana daha min ədəd həmin avtomatdan gətiriləcək.

Onları ictimai yerlərdə — böyük ticarət obyektlərində, Nizami küçəsində, dənizkənarı bulvarda, vağzallarda, metroda və adamların daha çox qələbəlik olduğu yerlərdə quraşdıracaqlar. Odur ki, şəhər əhalisi boş butulkaları zibil yeşiklərinə deyil, avtomata atacaqlar. Əvəzində pula ekvivalent olan qəbz alacaqlar. 

"1000-1200 aparatın quraşdırılması planlaşdırılır. Bu artıq təsdiqlənib. Şirkət fəaliyyət göstərir və boş qabları toplayacaq. Bizim vətəndaşlara verəcəyimiz pula gəlincə, bu, hələ məlum deyil. Bu, paytaxtda ilk pilot aparatların quraşdırılmasından sonra bəlli olacaq" — deyə şirkətin nümayəndəsi bildirib.

Artıq məlumdur ki, adamlar aparata boş butulkaları buraxandan sonra aparat onlara qəbz verəcək. Həmin qəbzlə mağazalara gedib mobil telefona balans yükləmək, yaxud da ehtiyac duyulan başqa şeyləri almaq olar.

Ağayev deyir ki, sözügedən aparatlar Almaniyadan alınıb və onların qiyməti 12-25 min avrodur. Bununla yanaşı, Bakıda Qafqazın ən böyük plastik butulkaların təkrar emalı zavodu tikilir.

Aparatların kifayət qədər baha başa gəldiyini hesaba alsaq, onda elə güman etmək olar ki, ondan əldə edilən gəlirlər də çox olacaq. Lakin şirkətin nümayəndəsi bildirir ki, onların layihəsinin reallaşdırılmasında hər hansı kommersiya məqsədi güdülmür: "Doğrusu, biz gördüyümüz işin müqabilində əldə edəcəyimiz vəsaitlər barədə düşünməmişik. Bizim əsas məqsədimiz şəhərin təmizliyini, ekologiyasını qorumaq və yeni iş yerləri açmaqdır. Misal üçün, 350 iş yeri açılacaq. Bu, avronun qarşılığının dövlətə verilməsi deməkdir və insanlar bundan pul qazanacaqlar".

Ağayev, həmçinin əlavə edib ki, bu, dövlət tərəfindən təsdiqlənmiş özəl layihədir. Dövlət əhalinin mənafeyinə xidmət edən layihələrin reallaşdırılmasında maraqlıdır. Bu layihənin reallaşdırılmasına 50 milyon avrodan artıq vəsait xərclənib. 

Bununla yanaşı, qeyd etmək lazımdır ki, fandomat — ikinci əldən qabları, o cümlədən, alüminium bankaları və polietilentereftalat butulkaları əhalidən alaraq əvəzində qəbz şəklində pul mükafatı təqdim edən robotlaşdırılmış aparatdır. Onun verdiyi qəbzlərdən quraşdırıldığı mağazalarda istifadə etmək olar.

Toplanmış bu xammallar təkrar emal üçün nəzərdə tutulur və bütün dünyada gəlirli biznes sayılır. Bir sıra ölkələrdə bu qurğular və zavodlar onların quraşdırılması və tikintisinə sərf edilən xərcləri bir ildə çıxarır. Təkrar emal edilmiş plastikdən bağlamalar, tikinti materialları, sintetik parçalar və digər məhsullar istehsal edilir. Misal üçün bir futbol köynəyinin hazırlanmasına sərf olunacaq poluester üçün 4 ədəd plastik butulka lazımdır.

Məqalədə : fandomatlar 
Bölmənin digər xəbərləri


® 2009 FAKTXEBER.COM - Azərbaycan Onlayn Xəbər Portalı

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


ƏLAQƏLƏR

  (+994 70) 870-47-49      (+994 55) 786-96-84

  [email protected]


Valyuta.com


Рейтинг@Mail.ru