İraq Kürd Regional Rəhbərliyinin (İKRR) bu gün keçirdiyi referendumla bağlı Türkiyə Xarici İşlər Nazirliyi sərt açıqlama verib. 

FaktXəbər-in məlumatına görə, açıqlamada, "İKRR-də bu gün keçirilən referendum nəticələri baxımından yox hökmündədir. İstər beynəlxalq hüquq, istərsə də İraq konstitusiyası baxımından hər cür hüquqi bazadan və legitimlikdən məhrum olan bu təşəbbüsü tanımırıq", - deyə bildirilib.

Nazirliyin açıqlamasında daha sonra belə deyilir: "Referendum zamanı ortaya çıxacaq şəraitdən yararlanmaq istəyən bəzi radikal ünsürlərin və terrorçuların milli təhlükəsizliyimizi hədəf alan aksiyalara başlaması halında və İraq daxilində milli təhlükəsizliyimizə yönələn hər cür təhdid qarşısında beynəlxalq hüquqdan və Böyük Millət Məclisinin verdiyi səlahiyyətdən irəli gələn bütün tədbirləri görəcəyimizi bir daha vurğulayırıq."

Bundan əlavə İran İslam Respublikasının İnqilabı Keşikçiləri Korpusu dünən referendumun keçiriləcəyi bölgə ilə sərhəddə genişmiqyaslı hərbi təlimlərə başlayıb.

Məlumata görə, təlimlər İranın Qərbi Azərbaycan ostanında "Məhərrəm" kod adı ilə həyata keçirilir.

Təlimlərdə pilotsuz uçuş aparatlarından, raket, artilleriya, hərbi hava qüvvələri və zirehli tank bölmələrindən istifadə edilir.