Rusiya prezidenti Vladimir Putin  Türkiyəli həmkarı Rəcəb Tayyib Ərdoğanla telefonla danışıb. Onlar Astanada Suriya müzakirələrinə birgə hazırlıq səyləri haqqında müzakirələr aparıblar. FaktXəbər-in RİA Novosti-yə istinadən məlumatına görə, bu barədə Kremldən bildirilib.

Qeyd edək ki, ötən ilin dekabr ayının ortalarında Putin və Türkiyənin dövlət başçısı Ərdoğan Qazaxıstan prezidenti ilə Astanada Suriyanın münaqişə tərəflərinin  görüşünün keçirilməsi ehtimalından danışmışdılar. Nursultan Nazarbayev bu ideyanı  dəstəkləyərək bildirmişdi ki, onun  ölkəsi əvvəldən Suriya münaqişəsinin dinc yolla həllinin tərəfdarıdır.

Dekabrın 29-da Putin  Suriyada atəşkəsin elan olunması, həmçinin hökumət  və silahlı müxalifət arasında  dinc danışıqlara  başlanması haqqında razılığın əldə olunması barədə elan etmişdi. Yanvarın 4-də isə Türkiyə XİN rəhbəri Mövlud Çavuşoğlu  diskusiyaların  yanvarın 23-də Astanada başlanacağını bildirmişdi.