Xalidə Mikayılova: “Evimin əvəzinə mənə yataqxanada 33 kvadratmetr otaq veriblər”

Mətbuata müraciət edən “Sovetski” sakini Mikayılova Xalidə Sulduz qızı Yasamal Rayon İcra Hakimiyyətinin nəzdində yaradılan Köçürmə Komissiyasından şikayətçidir. O bildirir ki, ona məxsu daşınmaz əmlakı aldadaraq ondan alıblar və bunun  qarşılığında yataqxanadan azkvadratlı otaq veriblər. 

Şikayətçinin sözlərinə görə, ona məxsus ev 22-ci Nərimanov döngəsi, dalan 2, ev 1-də olub və mülkiyyət sənədi varmış: “Amma mənim sənədli evimin əvəzinə yataqxanada azkavadratlı otaq veriblər. Komissiyanın üzvləri Koroğlu Rəhimov küçəsində yerləşən yataqxanadan 42-45 kvadratmetr otaq verildiyi deyildi. Mən də ona inanıb onların göstərdiyi sənədlərə imza atdım. Yerləşəndə biz otağın sahəsini ölçdük və məlum oldu ki, otağın sahəsi 33 kvadratmetrdir. Mən aldadıldığımın fərqinə varanda hiddətləndim. Ağladım. İndi 5 uşağımla birlikdə Köçürmə Komissiyasındayam. Məni qəbul etmirlər. Komissiya sədri, icra başçısının birinci müavini Səməd İslamovun məzuniyyətdə olduğu deyilir. Komissiyanın rəhbər şəxslərindən olan Maliyyə Nazirliyinin nümayəndəsi Cavanşir müəllim isə məni qəbul etmir”.

Xalidə Mikayılova deyir ki, 25 nəfər üzvü olan Köçürmə Komissiyasından haqqını tələb edir: “Mən demirəm mənə pul ver, mənə haqqımı-evimi verin. Mən bozağımdan kəsib pul yığıb 2003-ci ildən “Sovetski”dən ev almışdım. Dedim ölüb gedərəm, balamın qalmağa yeri olsun. Mülkiyyət sənədi olan evimin əvəzinə mənə indi sənədsiz otaq veriblər. Üstəlik məni aldadıblar. 

Mənim uşağımın haqqını kəsiblər. Başqa ölkələrdə uşaqlara təminat və təzminat verir, bizdə isə əksinə, uşağın haqqını alıblar. Vicdanları yoxmu? 

Prezident “Sovetski”yə gəlmişdi, məmurlar ona deyirdilər ki, sakinlərə evlərinin 2-3 qat artğına ev veriblər, hamı razıdır.  

Mənim həyat yoldaşım müharibə veteranıdır. İkinci qrup əlil olan Ayaz Qurbanov hökumətin qəpik-quruş müavinətini almır. Vətəndaşa dəyər verilmir, hüquqlarımız açıq-aşkar pozulur”. (Bizim Yol)