Xəbər Lenti

İnfoqrafika

Arxiv

Yazar

02 İyun

2015
14:27
870
Putinin verdiyi mükafat Şeyxi qoruya biləcəkmi?

Azərbaycan hakimiyyəti daxilində Allahşükür Paşazadəyə qarşı hücumların artdığı bir vaxtda Moskvadan dəstək mahiyyətli mükafatlar gəlir, Rusiya ənənəvi ruhaniliyin son qalalarından birini qoruma altına alır

Xəbər verdiyimiz kimi, ötən həftə Rusiya prezidenti Vladimir Putin QMİ sədri Şeyxülislam Allahşükür Paşazadəni növbəti dəfə təltif edib. Rusiyanın Azərbaycandakı səfiri Vladimir Doroxin Şeyxülislama konfessiyalar və xalqlar arasında sosial-mədəni əlaqələrin qurulmasında xidmətlərinə görə Rusiya prezidentinin təşəkkürnaməsini təqdim edib.

Şeyxülislam təqdimetmə mərasimində bildirib ki, Vladimir Putin ona yüksək etimad göstərir: “O, görüşlərimiz zamanı bunu dəfələrlə söyləyib. Mən isə həmişə bu etimadı doğrultmağa çalışmışam”.

Qeyd edək ki, buna qədər Şeyx Rusiyanın “Dostluq” və “Şöhrət” ordenlərinə, habelə I dərəcəli “Müqəddəs Apostola bərabər knyaz Böyük Vladimir”, I dərəcəli “Müqəddəs Sergey Radonejski”, Rus Pravoslav Kilsəsinin “Şöhrət və şərəf” ordenlərinə layiq görülüb. 

Yeri gəlmişkən, aprelin 25-də Yekaterinburq və Verxoturye mitropoliti Kirill Şeyxülislam Hacı Allahşükür Paşazadəyə Rus Pravoslav Kilsəsinin Yekaterinburq Yeparxiyasının “Yekaterinburq Yeparxiyasının 130 ili” medalını, habelə xatirə hədiyyələri təqdim edib.

Şeyxülislamın Rusiya ilə yaxın əlaqələrinin olması heç kimə sirr deyil. SSRİ vaxtından Zaqafqaziya regionunun dini lideri titulunu daşıyan Allahşükür Paşazadənin Moskva ilə əlaqələri yaxşı olub. Ancaq məlum olduğu kimi hazırda Şeyxin Azərbaycan hakimiyyəti daxilində ciddi rəqibləri formalaşıb və hər addımda QMİ sədrinin mövqelərini laxlatmağa çalışırlar. Belə bir vaxtda Rusiyadan ardıcıl olaraq Şeyxə təltiflərin “yağması” QMİ sədri üçün dəstək mahiyyəti daşıyır. Məlum olduğu kimi, son illərdə Rusiya hakimiyyəti ölkə daxilində ənənəvi İslam ruhaniliyini ciddi şəkildə dəstəkləyir. 

Yeltsin dönəmində yaranmış vəziyyətdə Rusiya ərazisində, xüsusən də müsəlmanların kompakt yaşadığı Şimali Qafqaz regionunda xaricdən dəstəklənən radikal islam cərəyanlarının yayılması və bunun fonunda ənənəvi ruhaniliyin sıxışdırılması müşahidə olunsa da, Putin dönəmində mərkəzi hakimiyyət ənənəvi ruhani cərəyanları, din xadimlərini dəstəkləmək xətti tutdu. 

Təbii ki, ənənəvi ruhaniliyin əsas mərkəzlərindən biri də QMİ-dir. Şeyxülislam Azərbaycanda olduğu qədər Şimali Qafqazın ənənəvi ruhani liderləri arasında nüfuza sahibdir. Rusiya isə Çeçenistanın timsalında gəlmə ruhaniliyə qarşı ənənəvi ruhanilikdən istifadə etməklə ciddi uğur qazana bildi. Məhz bu səbəbdən də Rusiya baş müftisi Ravil Qaynutdinlə soyuq münasibətlərinin olmasına baxmayaraq Şeyxin Şimali Qafqaz ruhaniliyi üzərində təsiri Moskva tərəfindən dəstəklənib. 

Bu xətt, göründüyü kimi, Şeyxin özünü də məmnun edir. Bu səbəbdən də QMİ sədri Rusiya ilə əlaqələrinə böyük önəm verir. Aydın məsələdir ki, Bakıda Şeyxə qarşı münasibətin dəyişməsini Moskvada da müşahidə edirlər. Belə bir vəziyyətdə Moskvadan QMİ-yə ziyarətlərin artması, mükafatlandırmalar Şeyxə qarşı Bakıdakı müxaliflərinin əməllərinə cavab xarakteri daşıyır. Yeri gəlmişkən, diqqətli oxucular xatırlayır ki, 2000-ci illərin əvvəllərində Bakıda Şeyxə qarşı hücumlar artan zaman Şeyxülislam idarəni Tiflisə köçürəcəyi ilə bağlı mesaj vermişdi. Bu mesaj böyük rezonans doğurmuşdu.

Görünür, bu dəfə Şeyxə dəstək Moskvadan gəlib. Doğrudur, hazırda Rusiya ilə Azərbaycan hakimiyyətləri arasında münasibətlər xeyli dərəcədə istidir. Bu mənada indiki vaxtda Rusiya prezidentinin mükafatlandırmaları QMİ sədri üçün vazkeçilməzdir. Ancaq Putinin jestlərinin Şeyxin Bakıdakı rəqiblərini nə qədər sakitləşdirə biləcəyini zaman göstərəcək.

Kənan

Xəbərlərimizi Faktxeber.com-un facebook səhifəsində də izləyə bilərsiniz.
Mətndə səhv varsa, həmin səhvi seçib Ctrl + Enter düyməsini basaraq bizə göndərin

Bakı metrosunda sərnişinin halı pisləşib

18

Avqust
11:23
HÜQUQ,HADİSƏ
254

Şəmkirdəki yanğının DƏHŞƏTLİ TƏFƏRRÜATI

18

Avqust
11:12
HÜQUQ,HADİSƏ
1872

Azərbaycan neftinin qiyməti 62 dollara yaxınlaşıb

17

Avqust
13:00
İQTİSADİYYAT
400

Sabah Bakıda 34 dərəcə isti olacaq

17

Avqust
11:09
ÖLKƏ
1339

Dünya bazarlarında neft bahalaşıb

17

Avqust
10:12
İQTİSADİYYAT
469
Bölmənin digər xəbərləri


® 2009 FAKTXEBER.COM

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


19-08-2019 08:21



  (+994 55) 786-96-84

  [email protected]

Valyuta.com

Рейтинг@Mail.ru