Şaban ayı çox şərafətli bir aydır. Bu ay İslam Peyğəmbərinə (s) məxsusdur. O həzrət bu ayı oruc tutar və buyurardı: “Hər kim mənim ayımda bir gün belə oruc tutsa, cənnət ona vacib olar.”

İmam Sadiqdən (ə) nəql olunur ki, imam Zeynəlabidin (ə) Şaban ayı səhabələrini ətrafına toplayıb buyurardı: “Ey mənim səhabələrim! Heç bilirsiniz ki, bu hansı aydır!? Şaban ayıdır. Peyğəmbər (s) buyurardı: “Şaban mənim ayımdır. Öz peyğəmbərinizə məhəbbət bəsləmək və Allaha yaxınlaşmaq məqsədilə bu ayda oruc tutun! Əli ibn Hüseynin canı əlində olan Allaha and olsun ki, atam Hüseyn ibn Əlinin (ə) Əmirəlmöminin Əlidən (ə) belə buyurduğunu eşitdim: “Hər kəs Peyğəmbərə (ə) məhəbbət bəsləmək və Allaha yaxınlaşmaq naminə bu ayda oruc tutsa, Allah onu Özünə yaxın bilər, qiyamət günü Öz kəramətindən ona bəxş edər və cənnəti ona vacib bilər.”

Müqəddəs Şaban ayının da Rəcəb ayı kimi, həm müştərək əməlləri, yəni ayboyu edilə bilinəcək əməllər, həm də xüsusi günlərə aid olan əməlləri vardır. Şaban ayının ilk gecəsinin və ilk günün əməllərini təqdim edirik.

1. Oruc tutmaq.

2. Hər gün 70 dəfə İmam Sadiqdən (ə) nəql olunan bu zikri demək: Əstəğfirullahə və əsəluhut təvbəh

3. Hər gün 70 dəfə aşağıdakı zikri demək: Əstəğfirullahilləzİ lə iləhə illə huvər-rahmənir-rahimul-həyyul-qayyum və ətubu iləyh

4. Fəqir və ehtiyaclı olanlara sədəqə vermək. Hz. Əlidən (ə) ayın ən yaxşı əməli soruşulduqda, İmam (ə) buyurub: "Sədəqə və

bağışlanma diləmə".

5. Bütün ay boyu aşağıdakı zikri 1000 dəfə oxumaq: Lə iləhə illəllahu və lə nəbudu illə iyyəhu muxlisinə ləhud-dinə vələv kərihəl-muşrikun

6. Bu ayın hər 4-cü günü (cümə axşamı) iki rəkət namaz qılmaq. Namazın hər rəkətində "Həmd" surəsindən sonra 100 dəfə "Tövhid" surəsini oxumaq lazımdır. Namazın salamlarından sonra isə 100 dəfə salavat göndərmək. Hz. Əli (ə) Peyğəmbərdən (s) belə nəql edir: "Bu namazı qılan hər kəsin Allah dini və dünyəvi hacətlərini yerinə yetirər və bu günü oruc tutan şəxsin bədəninə cəhənnəm odu haram olar".

7. Peyğəmbər (s) və onun pak Əhli-beytinə (ə) çoxlu salavat göndərmək.

8. Şaban ayının hər günündə şəri zöhr vaxtı və gecə yarısı İmam Zeynəlabidindən (ə) nəql olunan "Salavati-Şabaniyyə"ni oxumaq. «Məfatihul-cinan», səh. 408-411-ə müraciət edin.

9. İbn Xalviyyədən nəql edilir ki, bu ayda Həzrət Əli (ə) və onun övladları (ə) bu münacatı oxuyardılar.«Məfatihul-cinan», səh. 412-yə müraciət edin.

Şabanın ilk gecəsinin əməlləri:

«İqbal» kitabında şaban ayının ilk gecəsi üçün çoxlu sayda namazlar qeyd olunmuşdur. Onlardan biri də 12 rəkətli namazdır. Namazın hər rəkətində "Həmd" surəsindən sonra 11 dəfə "Tövhid" surəsi oxunur. Hər iki rəkətdən bir salamlar verilir. 

Şaban ayının birinci gününün əməlləri 

Bu günün orucunun böyük fəziləti var. İmam Sadiq (ə) buyurmuşdur: «Şəban ayının birində oruc tutan şəxsə şübhəsiz ki, cənnət vacib olar». Seyid bin Tavus "İqbal" kitabında Allah Rəsulunun (s) belə buyurduğunu nəql edir: "Allah Şaban ayının ilk üç gününü oruc tutan və gecələrini iki rəkət namaz qılan (hər rəkətdə "Həmd" surəsindən sonra 11 dəfə "Tövhid" surəsi oxunur. insanı yer və göy əhlinin, iblis lənətliyin və hər bir zülmkarın şərrindən amanda saxlayar və onun bir çox günahlarını bağışlayar".