Xəbər Lenti

İnfoqrafika

Arxiv

Yazar

27 Fevral

2014
10:25
828
Türkiyə məscidlərində `Qazi Qarabağ azanı` səsləndirildi

FaktXəbər-in məlumatına görə, fevralın 26-da, Xocalı soyqırımının anım günü Ankara şəhərində Türkiyənin böyük tarixi ibadət evlərindən biri olan “Hacı Bayram Vəli” məscidində “Qazi Qarabağ azanı”nın təqdimat mərasimi keçirilib. Təqdimatda Azərbaycandan Dini Qurumlarla İş üzrə Dövlət Komitəsinin sədr müavini Gündüz İsmayılov, Türkiyə tərəfdən Diyanət İşləri başqanının müavini Hasan Kamil Yılmaz  iştirak ediblər. Tədbirə Azərbaycanın Türkiyədəki səfirliyinin nümayəndələri, bu şəhərdə təhsil alan azərbaycanlı tələbələr və yüzlərlə yerli dindar qatılıb.

Qeyd edilməlidir ki, yüz illər ərzində formalaşmış dini ənənələri və Diyanət İşləri Başqanlığı kimi nüfuzlu dini təşkilatı olan Türkiyənin məscidlərində başqa bir ölkədən gətirilmiş azanın oxudulması və xüsusi olaraq onun təqdimatının keçirilməsi ilk dəfədir.

Təqdimat mərasimində çıxış edən G.İsmayılov bildirmişdir ki, bu gün “Xocalıya Ədalət” Beynəlxalq Təbliğat-Təşviqat Kampaniyası çərçivəsində Xocalı soyqırımının 22-ci ildönümü münasibətilə əksər müsəlman ölkələrinin məscidlərində “Qazi Qarabağ azanı” səsləndirilir və tarixi “Hacı Bayram Vəli” məscidindəki təqdimat da həmin tədbirlərdən biridir.

İşğal edilənə qədər Ağdam və Şuşa “Cümə” məscidlərində oxudulmuş “Qazi Qarabağ azanı”nın 20 ildən sonra ilk dəfə 2013-cü ildə dini icmaların təşəbbüsü və Dövlət Komitəsinin dəstəyi ilə bərpa olunduğunu önə çəkən G.İsmayılov qeyd edib ki, bu azanın Xocalı soyqırımının anım günündə müsəlman ölkələrinin məscidlərində səsləndirilməsi təşəbbüsünü ilk gündən Diyanət İşləri Başqanlığı dəstəkləyib. Dövlət Komitəsinin nümayəndəsi bildirib ki, Türkiyədəki məscidlərdə cümə günü Xocalı soyqırımı ilə bağlı xütbə oxunması və “Qazi Qarabağ azanı”nın səsləndirilməsi təkcə qardaşlığımızın və həmrəyliyimizin deyil, həm də haqq və ədalətsevər Anadolu insanının bu dəyərlərə həmişə olduğu kimi, bu gün  də sadiq qalmasının və Xocalıya ədalət tələb etməsinin göstəricisidir.

H.K.Yılmaz isə öz növbəsində Xocalı soyqırımı ilə bağlı Diyanət İşləri Başqanlığı tərəfindən həyata keçirilmiş və gələcəkdə planlaşdırılan tədbirlər barədə geniş məlumat verib. Diyanət İşləri Başqanlığının rəsmisi qeyd edib ki, ötən il olduğu kimi, bu il də Xocalı soyqırımının ildönümü ərəfəsində, 21 fevralda Türkiyənin bütün mərkəzi məscidlərində soyqırımının qurbanları anılmış və bu barədə xüsusi vaaz (dini məzmunlu çıxış) verilib. Bunun artıq ənənə halını aldığını deyən H.K.Yılmaz bildirib ki, 26 fevralda “Qazi Qarabağ azanı”nın təqdimatı “Hacı Bayram Vəli” məscidi ilə yanaşı, İstanbulda Türkiyənin tarixi məscidlərindən biri olan “Eyyub Sultan” məscidində və İğdırın mərkəzi məscidində də təşkil edilib. Məqsəd isə Xocalı soyqırımını və “Qazi Qarabağ azanı”nı Türkiyədə dindar kəsimə tanıtmaqdır. Qazi Qarabağ azanının yenidən  işğal olunmuş Azərbaycan torpaqlarında yenidən səsləndirilməsi təkcə Azərbaycanın deyil eyni zamanda Türkiyənin də mühüm və zəruri vəzifələrindəndir.

Çıxışlardan sonra “Qazi Qarabağ azanı” səsləndirilib və günorta namazı qılınıb. Mərasimdə şəhidlərin ruhuna və işğal olunmuş torpaqların tezliklə azad edilməsi üçün birgə dualar oxunub. Qeyd edək ki, təqdimat TRT Avaz telekanalında canlı olaraq yayımlanıb.

Xəbərlərimizi Faktxeber.com-un facebook səhifəsində də izləyə bilərsiniz.
Mətndə səhv varsa, həmin səhvi seçib Ctrl + Enter düyməsini basaraq bizə göndərin

Naxçıvan əhalisinin sayı artıb

20

May
22:40
ÖLKƏ
72

Təhsil Nazirliyindən ibrətamiz videoçarx

20

May
17:38
ELM / TƏHSİL
1339
Bölmənin digər xəbərləri


® 2009 FAKTXEBER.COM

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


21-05-2019 04:31



  (+994 55) 786-96-84

  [email protected]

Valyuta.com

Рейтинг@Mail.ru