“Hesab edirəm ki, Azərbaycan əsgəri milli menyu ilə qidalanmalıdır. Ölkənin bütün imkanları vardır ki, əsgərlərə milli yemək verilsin. Xüsusilə döyüş bölgələrində əsgərlər üçün bu məsələ ciddi nəzərə alınmalıdır.” 

Bu sözləri FaktXeber.com-a hərbçi-ekspert, ehtiyatda olan polkvnik-leytenant Üzeyir Cəfərov Müdafiə Nazirliyinin Azərbaycan Silahlı Qüvvələrinin qida rasionunun dəyişdirilməsinə dair verdiyi göstərişlərə aydınlıq gətirərkən qeyd edib. Müsahib bildirdi ki, hal-hazırda Silahlı Qüvvələr ət konserv məhsulları ilə ölkə ərazisində olan zavodlar hesabına təmin edilir. Digər zəruri qida vasitələri isə Baltik yanı ölkələrdən gətirilir: 

“Sözsüz ki, qida rasionun təkmilləşdirilməsi zəruridir. Lakin bununla bağlı bir qədər başqa məlumatlar əldə etmişik. Belə ki, Müdafiə Nazirliyi yeni təchizat idarəsi yaradıb və tenderlər keçirəcək. Tenderlərin qalibi olan şirkətlər və müəssisələr əsgərləri qida ilə təmin edəcəklər. Digər tərəfdən əsgərlərin qidasına nəzarət edən qurumlar öz işlərini gücləndirməlidirlər ki, hərbi hissələrə gedib çatan ərzaq kimlərsə tərəfindən mənimsənilməsin. ”

Nazirlər Kabinetinin 2013-cü il yanvarın 3-ü tarixli qərarına əsasən əsgərlərə yeni ərzaq normasının tətbiq edildiyini bildirən ekspert, “qəribə olan budur ki, həmin qərarda köhnə ərzaq normaları qüvvədən düşmüş hesab olunub və yeni qida rasionu bütün əsgər və zabitlərə tətbiq edilməklə yanaşı onun əvəzində pul kompensasiyasının verilməsi də nəzərdə tutulub”, - deyə qeyd etdi: “Əgər əvvəllər əsgərlərə 2 yumurta verilirdisə, indi bu göstərici 4-5-ə çatdırılıb. Digər tərəfdən verilən ətin miqdarı da artırılıb. Lakin təəssüflər olsun ki, biz yenə də hərbi hissələrdən ərzaqla bağlı əli əyriliklərə, saxtakarlığa yol verilməsinə dair məlumatlar eşidirik. Bu işlərlə bağlı cavabdehlik daşıyan şəxslər yetərincə fəaliyyət göstərmirlər. “

Üzeyir bəy sonda bildirdi ki, yeni göstərişlərin nəticəsini zaman keçdikcə müşahidə edə biləcəyik.