Qarabağ müharibəsinin bir qrup veteranı dekabrın 26-da Həmkarlar İttifaqları Konfederasiyasının sədri, deputat Səttar Mehbalıyevlə görüşüb. “Azadlıq” radiosunun məlumatına görə, görüşdə özünü yandıran müharibə veteranı Zaur Həsənovla bağlı müzakirə aparılıb. Qazi Firudin Məmmədov deyib ki, Zaur Həsənovun vəziyyəti çox ağırdır: “Əsas tələbimiz bu oldu ki, onun müalicəsinə yardım etsinlər. Səttar Mehbalıyev söz verdi ki, kömək edəcəklər. Digər tələbimiz Zaurun mülkünün özünə qaytarılmasıdır”.

Zaur Həsənov dekabrın 25-də Həmkarlar İttifaqları Konfederasiyasının binası önündə üstünə benzin tökərək özünü yandırıb. O özünə qəsdi 1995-ci ildən bəri paytaxtın Bibiheybət qəsəbəsində işlətdiyi kafenin əlindən alınması ilə əsaslandırıb. Zaur Həsənov iddia edir ki, kafeni onun əlindən Həmkarlar İttifaqları Konfederasiyasının rəhbəri, deputat Səttar Mehbalıyev alıb.

Səttar Mehbalıyev “Azadlıq” radiosuna deyib ki, Zaur Həsənov həmin ərazini zəbt edibmiş: “Tək o deyil, 7-8 nəfər həmin ərazini zəbt ediblər. Həmin ərazini boşaltmaq barədə məhkəmə qərarı olub. Məhkəmə icraçıları da öz vəzifələrini yerinə yetiriblər. Dəfələrlə həmin şəxs mənim qəbulumda olub. Və məndən məhkəmənin qərarını ləğv etdirməyimi istəyib. Mən ona buna səlahiyyətim çatmadığını demişəm. Bu məsələdə adımızın hallanmağına çox pis olmuşam”.

“Azadlıq” radiosu xəbər verir ki, səhiyyə naziri Oqtay Şirəliyev 5 saylı xəstəxanada Zaur Həsənova baş çəkib, həkimlərə müalicə üçün lazımi tədbirlərin görülməsini tapşırıb.