Bu gün Milli Şuranın qapalı toplantısı keçirildi. Toplantıda Şuranın bir neçə kimissiyası yaradıldı və vahid namizəd Rüstəm İbrahimbəyovun Seçki Qərargahının strukturu müzakirə edildi. Jurnalistlər üçün keçirilən birifinqdə açıqlama verən ACP sədri Sülhəddin Əkbər bildirdi ki, Seçki Qərargahı çox mühüm bir orqan olduğu üçün buraya rəhbərlik barədə geniş müzakirə tələb olunur. FaktXəbər-in məlumatına görə, R.İbrahimbəyovun Seçki Qərargahı ilə bağlı politoloq Elxan Şahinoğlunun da maraqlı bir təklifi var; xaricdən seçki texnoloqları dəvət etmək. Elxan bəy deyir: "Hakimiyyət son bir neçə seçkidə xarici siyasi texnoloqları Bakıya dəvət edərək onların potensialından istifadə edib. Əlbəttə, seçkidə istifadə olunan "karusel" və digər" əməllər də var ki, onlardan da istifadə olunur. Hakimiyyət xarici siyasi texnoloqlara kifayət qədər maliyyə ayrılır. Deyirəm ki, əgər Rüstəm İbrahimbəyovun maliyyə imkanı varsa o da xaricdən bir neçə tanınmış mütəxəssisi seçki qərargahına dəvət etsə yaxşı olar. Qoy onlar da bir-birlərinə qarşı yarışsınlar. Əlbəttə, Milli Şura çərçivəsində də hörmət etdiyim ekspertlər var ki, onlar da müasir seçki texnologiyalarını hərəkətə gətirə bilər, yaradıcı yanaşma ortaya qoyarlar. Ancaq Milli Şura çərçivəsində beynəmiləl komandanın varlığı da pis olmazdı. Digər post-sovet ölkələrində də xarici mütəxəssislərin əməyindən istifadə olunub."