Uzun müddətdir Azərbaycan İslam Partiyasının tədbirlərində qurumun təşkilati məsələlər üzrə sədr müavini Rövşən Əhmədli iştirak etmir. Bununla bağlı indiyə qədər hər hansı bir açıqlama olmadığı üçün, R.Əhmədli ilə əlaqə saxladıq.
İslam Partiyasının tədbirlərində iştirak etməməsinin səbəbləri ilə bağlı FaktXəbər-ə açıqlama verən Rövşən bəy bildirdi ki, artıq 3 aydır ki, bir sıra mühüm məsələlərin həlli ilə əlaqədar AİP-in tədbirlərində iştirak edə bilmir: “Bununla əlaqədar partiya rəhbərliyinə məlumat vermişəm və artıq  sədr müavini postundan istefam qəbul olunub. Yalnız prosedur qaydalara əsasən, istefam partiyanın ali orqanı olan Baş Məclisdə təsdiq edilməlidir ki, o da yəqin növbəti Baş Məclisin gündəliyində olacaq.”

Belə həssas dönəmdə bu istefanın yarada biləcəyi çoxsaylı sualların AİP-n ümumi  fəaliyyətinə mənfi təsirləri haqda suala isə Rövşən Əhmədli belə cavab verdi: “Biz  partiyamızın ən çətin zamanlarında onu dağıtmaq istəyənlərə bunu reallaşdırmağa imkan verməmişik. İstər partiya rəhbərliyinə qarşı sifarişli, qərəzli, qanunsuz həbslərdə olduğu dövrlərdə, istərsə də şəxsi ambisiyaları və ya tapşırıq əsasında   “namusum, qeyrətimdi partiya” deyənlərin mətbuat klublarında AİP-n rəhbərliyi və ümumiyyətlə partiya əleyhinə geniş kampaniyalar apardıqları zamanlarda. İndi mən  zəruri hal kimi sədr müavinliyindən istefa verirəm, amma hər an islamçılarla bir  səfdəyəm. Bizim məktəbimiz bəlli, səfimiz bəlli, xətlərimiz də bəllidir. Verdiyimiz qərarlar da ümumilikdə təhlil olunub, razılaşdırılıb və bəyənilən qərarlardır. Azərbaycan islamçıları ən çətin və mürəkkəb dövrlərdə belə, mütəşəkkilliyini və ardıcıllığını hifz edə bilib. Düşünürəm ki, hansı vəzifə tutmağımızdan asılı olmayaraq   bütün islamçıları eyni ideya və xətt birləşdirir. Bizim bir məqsədimiz var - azad, müstəqil, hüquqi Azərbaycan dövləti yaratmaq. Bu yolda hamıya Allahdan uğurlar diləyirəm.”