Bu günlərdə bir dostum maraqlı bir hadisəni nəql etdi. Əvvəl o qədər də önəm vermədim, amma son günlərin hadisələri həmin məsələni yenidən xatırlatdı mənə.

Dostum hadisəni belə danışdı: 3-4 nəfər yaxın dost bir gün münaqişələri olduğu kişini tutub çölə aparırlar. Əvvəl onu yaxşıca döyürlər. Sonra qərara gəlirlər ki, öldürsünlər. Onların bu fikrə düşməsini görə həmin kişi başlayır yalvarmağa ki, “buraxın gedim, ailəm var, uşaqlarım var, onları başsız qoymayıb. Mən ki, sizə heç nə etməmişəm. Siz mənim obyektimi almaq istəmisiniz, mən də satmamışam, buraxın məni, sabah gəlin yeri siz verim.” Amma dostlar razılaşmırlar ki, onsuz da səni öldürdükdən sonra ora bizimdir, sağ qalsan, gedib orda-burda ağzına gələni danışacaqsan. Həmin kişi yenə yalvarır ki, heç kimə heç nə danışmayacaq, amma onu öldürsələr, həbs oluna bilərlər. Dostlar da deyir ki, kim biləcək, heç kəsin xəbəri olmayacaq. Vəziyyətin belə olduğunu görən kişi, “bu altında durduğumuz ağac, yer-göy, bu otlar şahidim olsun”, deyir. Və dostlar kişini öldürürlər.

Hadisədən illər keçir. Bir gün həmin dostlar oturub yeyib-içirlər. Və içkinin təsirindən başlayırlar danışıb, deyib-gülməyə. Biri qayıdır ki, “ə, o zəvzək nə deyirdi başını kəsəndə?” O biri dost da cavab verir ki, “ağacı, otu şahid göstərirdi”. Və başlayırlar gülməyə.

Hadisəni eşidən qonşu stoldakı 2 nəfər onlara yaxınlaşıb özlərini təqdim edirlər. Polis mayoru və polis kapitanı filankəs filankəsov.

…Dəmir barmaqlıqlar arxasında oturan dostlardan biri son söz olaraq belə deyir: “Doğrudan da ağac şahidlik etdi. Qətli gizlədə bilmədik.” … Və məhkəmə hökm kəsir - ömürlük.

Doğrudan da düşündürücüdür. Haqsız işlərin və gizlində görülən pis əməllərin şahidi varmış. Elə Türkiyədəki kimi. İllərlə özünü dindar kimi göstərən Ərdoğan hökuməti gizlində apardığı danışıqları gün üzünə çıxdı. Liviyada hadisələr zamanı, “biz imkan vermərik ərazilərimizdən hansısa ölkəyə hücum olsun”, - deyən Ərdoğan, Suriyadakı qanların axıdılmasına birbaşa vasitəçilik edir, terrorçuları həvəsləndirir. Dünya siyasətinə diqqət yetirsək, artıq Suriya hadisələrindən Türkiyədən başqa maraqlı tərəf yoxdur. Yalnız Ərdoğan hökuməti qanın bir qədər də çox axmasına həvəsli görünür. Amma baxın nə oldu, Türkiyənin Taksim meydanında bir ağacın kəsilməsinə görə, xalq ayağa qalxdı. Özünü demokratiyanın carçısı kimi göstərən, Suriyada Əsəd hakimiyyətinin insan haqlarını pozduğunu söyləyən, terrorçuları himayə edən Ərdoğan, ağac kəsilməsinə etiraz edən insanlarla elə terrorçu kimi də davranır. Bəs harada qaldı demokratiya dərsləri, insan haqları. Yəqin ki, Ərdoğan hökuməti 21 milyon dollar xərcləyərək 628 ton bibər qazını məhz demokratiyanın bərqərar olması üçün edibmiş.

Amma əmin olun, Taksimdə kəsilən o ağacın şahidləri var.